IMF zai soma ajiye kudi da Yuan na China
Asalin hoton, AP
Asusun bada lamuni na duniya,IMF ya amince da sanya kudin China Yuan cikin kudaden kasashen waje da ake ajiyewa a asusunsa.
Wannan mataki dai tamkar na jeka na yika ne, amma kuma yana nuna irin karfin da China take kara samu a matsayin daya daga cikin kasashen da ke kan gaba a tattalin arzikin duniya.
A yanzu Yuan, yabi sawun dalar Amurka da Euro da Yen na Japan da kuma Fan na Biritaniya cikin jerin kudaden da ake ajiyarsa a IMF.
Tun a shekarar da ta wuce ne China ta bukaci a saka Yuan a cikin jerin.
IMF ya ce sai a watan Okotobar 2016 ne matakin zai soma aiki.
Tattalin arzikin China shi ne na biyu mafi girma a duniya.
