Edrych yn ôl ar 13 Rhagfyr

Mae Llywodraeth Cymru wedi cyfadde' am y tro cynta' na fyddan nhw'n llwyddo i gyrraedd eu nod o gael gwared â thlodi plant erbyn 2020.

Dywedodd yr Ysgrifennydd Cymunedau heddiw fod 'na welliant wedi bod mewn amcanion eraill sy'n gysylltiedig â thlodi plant.

Mae dileu tlodi plant erbyn 2020 wedi bod yn amcan tymor hir i'r llywodraeth, ac roedd yn rhan o strategaeth tlodi plant gafodd ei gyhoeddi y llynedd.

Noson fwyn a sych ar y cyfan, ond yn cymylu gyda niwl ar y tir uchel. Bydd hi'n fwy gwyntog yn y gorllewin gyda phosibilrwydd o law yn hwyrach. Tymheredd isaf: 7°C.

Yfory bydd hi'n gymylog ond yn troi'n brafiach yn y dwyrain yn ystod y dydd. Glaw yn debygol yn y gorllewin. Tymheredd uchaf: 12°C.

Ar wefan Radio Cymru, mae uchafbwyntiau'r wythnos ddiwethaf, o raglenni Aled Hughes, Bore Cothi a Geraint Lloyd, gyda chyflwyniadau clir a syml fydd o gymorth i ddysgwyr Cymraeg.   

BBCCopyright: BBC

Does dim problemau difrifol iawn ar y ffyrdd y p'nawn 'ma, ond mae 'na oedi a thraffig trwm ar yr M4 tua'r gorllewin rhwng cyffyrdd 39 a 40 ar ôl i gar dorri lawr yn gynharach.

Mae traffig trwm hefyd ar yr A4161 ar Rover Way yng Nghaerdydd gan fod goleuadau traffig wedi torri.  

Bydd arweinydd Cyngor Castell-nedd Port Talbot, Alun Thomas, yn gadael ei swydd y flwyddyn nesa'.

Dywedodd y cynghorydd dros ward Onllwyn wrth grŵp Llafur y sir heddiw na fydd e'n sefyll yn etholiadau lleol mis Mai 2017.

Ychwanegodd ei fod yn fodlon aros fel arweinydd tan yr etholiadau, ond mai penderfyniad i'r grŵp fyddai hynny.

Cyngor Castell-nedd Port TalbotCopyright: Cyngor Castell-nedd Port Talbot

Mae tŷ yn Sir Gaerfyrddin, lle roedd sêr roc fel Freddy Mercury a Black Sabbath yn treulio'u hamser yn y 1970au, ar werth am £1m.

Ar wefan y South Wales Evening Post, mae lluniau o'r cartref a arferai fod yn le i fandiau o Lundain ddianc ac ymarfer ar gyfer eu teithiau. 

Bydd Llywodraeth Cymru'n cyflwyno rhaglen i greu corff o gyfreithiau Cymreig.

Dywedodd y Cwnsler Cyffredinol, Mick Antoniw, y bydd cyfreithiau mewn meysedd sydd wedi eu datganoli yn cael eu casglu a'u codeiddio fel rhan o god cyfreithiol Cymreig.

Fe fydd y cyfreithiau wedyn ar gael ar wefan Cyfraith Cymru.

Mae'r Eglwys yng Nghymru wedi datgan eu siom am y ffrae gyhoeddus am ad-drefnu ysgolion yn Y Bala yn sgil cyhoeddiad Cyngor Gwynedd y byddan nhw'n gohirio penderfyniad ar ailagor ymgynghoriad ar y mater.

Dywedodd yr Eglwys mewn datganiad eu bod wedi eu "synnu gan ddehongliad Cyngor Gwynedd o'n safbwynt."

"Yn wahanol i'r honiadau yn y cyfarfod, roedd ein swyddogion addysg wedi cadw cyswllt gyda swyddogion o Gyngor Gwynedd, gan wneud nifer o geisiadau i gyfarfod aeth heb eu hateb," meddai.

Ychwanegodd eu bod yn "siomedig" bod y drafodaeth "gwbl osgoadwy" wedi ei lleisio yn gyhoeddus.

Mae bwrdd gweithredol Cyngor Wrecsam wedi cymeradwyo cynllun drafft i ddatblygu addysg Gymraeg yn y sir.

Daw hyn er i ymgyrchwyr ddweud wrth y BBC nad ydi'r cynllun yn ddigon i ateb y galw am lefydd mewn ysgolion Cymraeg eu hiaith yn yr ardal.

Dywedodd llefarydd y cyngor ar addysg, y Cynghorydd Michael Williams, y bydd y Cynllun Strategol Cymraeg mewn Addysg yn sicrhau bod lle i bob disgybl sydd eisiau addysg Gymraeg.

BBCCopyright: BBC

Mae dyn ifanc o Lanelli wedi pledio'n euog i hacio cwmni cyfathrebu TalkTalk a cheisio blacmelio prif weithredwr y cwmni.

Yn Llys yr Old Bailey, plediodd Daniel Kelley'n euog i gyhuddiadau o flacmel, hacio cyfrifiaduron a thwyll ariannol.

Roedd wedi gofyn am 465 bitcoin - gwerth £285,000 heddiw - yn yr ymgais i flacmelio ym mis Hydref 2015.

Cafodd ei ryddhau ar fechnïaeth a bydd yn cael ei ddedfrydu ar 6 Mawrth.

Mae cabinet Cyngor Gwynedd wedi dewis oedi cyn penderfynu os y byddan nhw'n ailagor yr ymgynghoriad i ad-drefniant ysgolion Y Bala. 

Roedd sôn y byddai'r cyngor yn ailymgynghori wedi ffrae rhyngddyn nhw â'r Eglwys yng Nghymru am statws ysgol newydd, sydd wrthi'n cael ei hadeiladu.

Bydd y cyngor nawr yn ystyried y llythyrau ac yn trafod ymhellach gyda phobl leol.

BBCCopyright: BBC

Mae Cyngor Sir Ynys Môn wedi cyhoeddi datganiad sy'n dweud:

Mae uwch swyddogion o Biffa a'r Cyngor Sir wedi condemnio digwyddiad lle bu i ddyn boeri ar weithiwr ailgylchu yn un o stadau'r Ynys. 

Digwyddodd yn hwyr ym mis Tachwedd wrth i'r criw ailgylchu weithio ar Stad Tan y Bryn yn Y Fali. 

Roedd traffig wedi ei ddal yn ôl am gyfnod byr tra bod y bocsys ailgylchu yn cael eu gwagio i mewn i lori ailgylchu Biffa, ac yna daeth dyn allan o fan arian a cherdded at y gyrrwr y lori. 

Fe agorodd y ffenest cyn i'r dyn boeri yn ei wyneb a gadael.

Yn ôl Y Cymro, mae Arweinydd Plaid Cymru wedi beirnadu Prif Weinidog Cymru am “wyrdroi gwirionedd” mewnfudo yng Nghymru.

Defnyddiodd Leanne Wood sesiwn heddiw o Gwestiynau i’r Prif Weinidog i herio’r Prif Weinidog dros ei sylwadau fod safbwynt Arweinydd Llafur y DG ar fewnfudo yn “chwarae i ddwylo UKIP”.

Mae'r heddlu yn Yr Eidal wedi dechrau ymchwiliad i'r gwrthdrawiad achosodd anafiadau difrifol i wraig cyn chwaraewr rygbi rhyngwladol.

Cafodd Kate Weaver-Gibbs, 32 oed ac yn wraig i Scott Gibbs, anafiadau i'w phen a'i hasgwrn cefn pan gafodd ei tharo gan feic modur.

Mae Ms Weaver-Gibbs yn parhau yn yr ysbyty ond dywedodd heddlu'r Eidal bod llawdriniaeth diweddar wedi bod yn llwyddiannus.

Kaidi PhotographyCopyright: Kaidi Photography