KNLA စစ်ဦးစီးချုပ် ဗိုလ်ချုပ်စောဂျော်နီ - တပ်မတော်ကို သည်းမခံရင် တိုက်ပွဲပြန်ဖြစ်တာကြာပြီ
ကရင်အမျိုးသားအစည်းအရုံး KNU ရဲ့ တပ်ဖွဲ့ ကရင်အမျိုးသားလွတ်မြောက်ရေးတပ်မတော် KNLA နယ်မြေတွေမှာ တပ်မတော်က ကားလမ်းဖောက်လုပ်တာနဲ့ နယ်မြေကျော်သွားလာနေတာတွေနဲ့ပတ်သက်ပြီး KNU က သည်းမခံရင် တိုက်ပွဲကြီးတွေ ပြန်ဖြစ်လာနိုင်တယ်လို့ KNLA စစ်ဦးစီးချုပ်က ပြောပါတယ်။
သင်္ကြန်မတိုင်ခင်မှာ ကေအန်ယူက အစိုးရ၊တပ်မတော်ကိုယ်စားလှယ်နဲ့ တွေ့ဆုံမယ့်အခြေအနေတွေနဲ့ပတ်သက်ပြီး မေးမြန်းစဉ်မှာ ဗိုလ်ချုပ်စောဂျော်နီက အဲဒီလိုပြောကြားတာ ဖြစ်ပါတယ်။
လက်ရှိမှာ KNU တပ်မဟာ ၃ နဲ့ တပ်မဟာ ၅ နယ်မြေတွေမှာ နယ်မြေကျော်ကားလမ်းဖောက်လုပ် တာကြောင့် တပ်မတော်နဲ့ KNU အောက်ခြေတပ်ဖွဲ့တွေအကြား အသေးစားပစ်ခတ်မှုတွေဖြစ်ပွား နေတဲ့အပေါ် KNU ဘက်ကသည်းခံလို့ တိုက်ပွဲကြီးတွေ မဖြစ်တာလို့ ဗိုလ်ချုပ် စောဂျောနီ က ဘီဘီစီကို ပြောပါတယ်။
ဒီလိုအောက်ခြေတပ်ဖွဲ့တွေအကြား ဖြစ်တဲ့ တပ်ပိုင်းဆိုင်ရာပြဿနာတွေကို သင်္ကြန်မတိုင်ခင် အစိုးရနဲ့ တပ်မတော်ကိုယ်စားလှယ်တွေနဲ့ အလွတ်သဘောတွေ့ဆုံပွဲမှာ တင်ပြဆွေးနွေးမယ်လို့ KNU က ပြောပါတယ်။
'' KNU ဘက်က တပ်ပိုင်းဆိုင်ရာကိုယ်စားလှယ်၊ အုပ်ချုပ်ရေးပိုင်းဆိုင်ရာကိုယ်စားလှယ်တွေပါမယ်။ နှစ်ဘက်အကြား တစ်ဆို့နေတဲ့ကိစ္စတွေဆွေးနွေးမယ်။ ဒီပြဿနာတွေအားလုံးဟာ တပ်မတော် အပေါ်မှာမူတည်တယ်။ ကျွန်တော်တို့ ရန်ဖြစ်တာနှစ်ပေါင်း ၇၀ ဖြစ်နေပြီ။ ဒါတွေကို ဖြေရှင်းရမယ်။ ဖြေရှင်းလို့မှမရင် တိုက်ပွဲတွေပြန်ဖြစ်လာမယ်'' လို့ ဗိုလ်ချုပ်စောဂျော်နီ က ပြောပါတယ်။
KNU ရဲ့ နယ်မြေကိုကျော်ပြီး သွားလာတယ်ဆိုရင် အကြောင်းကြားပြီးမှ စည်းကမ်းလိုက်နာပါက အကောင်းဆုံးဖြစ်ပြီး မလိုက်နာရင်တော့ ဆုံးမရမယ်။ နှစ်ဘက်စလုံးက အခြေအနေကို စောင့်ကြည့် နေကြတာ ။ တစ်ယောက်နဲ့တစ်ယောက် ယုံကြည်ကြတာမဟုတ်ဘူးလို့လည်း သူကပြောပါတယ်။
' ' လူထုလို လားတဲ့ ငြိမ်းချမ်းတဲ့နည်းလမ်းနဲ့ ကျွန်တော်တို့က ညှိနှိုင်း နေတာပဲရှိတယ်။ ကျွန်တော်တို့သာ သည်းမခံရင် တိုက်ပွဲကြီးပြန်ဖြစ်တာကြာနေပြီ'' လို့ ဗိုလ်ချုပ်စောဂျော်နီ က ပြောပါတယ်။
KNU က ဧပြီလ ၁၁ ရက်နေ့မှာ အမျိုးသား ပြန်လည်သင့်မြတ်ရေးနဲ့ ငြိမ်းချမ်းရေး ဗဟိုဌာနနဲ့ တွေ့ဆုံဖို့ စီစဉ်ထားပြီး ဧပြီလ ၁၂ ရက်နေ့မှာတော့ ဒုတိယဗိုလ်ချုပ်ကြီး ရာပြည့် ဦးဆောင်တဲ့ တပ်မတော်ကိုယ်စား လှယ်တွေနဲ့ တွေ့ဆုံဖို့ အဆိုပြုထားတယ်လို့ KNU က ပြောပါတယ်။
ဒီအစည်းအဝေးက ပေါ်ထွက်လာမယ့်ရလဒ်အပေါ်မူတည်ပြီး KNU က ဆက်လက်လုပ်ဆောင်မယ့် အစီအစဉ်တွေကို စဉ်းစားမယ်လို့လည်း ဗိုလ်ချုပ်စောဂျော်နီ က ပြောပါတယ်။
၂၀၁၈ ခုနှစ် အတွင်းမှာ ကရင်ပြည်နယ်မြောက်ပိုင်း ဖာပွန်ခရိုင်က KNU တပ်မဟာ ၅ ထိန်းချုပ်နယ်မြေမှာ တပ်မတော်က နယ်မြေကျော် ကားလမ်းဖောက်လုပ်တဲ့အတွက် KNU တပ်မဟာ ၅ တပ်ဖွဲ့ဝင်တွေနဲ့ တိုက်ပွဲ ဖြစ်ပွားခဲ့ပြီး အနီးအနားရှိ ရွာသားတွေ ၂၀၀၀ ကျော် ထွက်ပြေး ပုန်းရှောင်ခဲ့ရဖူးပါတယ်။
အဲဒီကားလမ်းတွေဟာ စစ်ရေးဆိုင်ရာ အထောက်အကူ ဖြစ်နိုင်တဲ့အတွက် လမ်းဖောက်လုပ်ရေး ကို တားမြစ်ထားတာ ဖြစ်တယ်လို့ KNU ဘက်ကပြောပါတယ်။
နေပြည်တော်မှာ လုပ်မယ့် ဆွေးနွေးပွဲနဲ့ ပတ်သက်ပြီး တပ်မတော် သတင်းမှန်ပြန်ကြားရေးကို ဘီဘီစီက ဆက်သွယ်ပေမဲ့ ဖုန်းမကိုင်လို့ သီးခြားအတည်ပြုနိုင်ခြင်းတော့မရှိပါဘူး။
KNU ဥက္ကဋ္ဌ မူတူးဆေးဖိုး မပါတော့မယ့် ငြိမ်းချမ်းရေး ဦးဆောင် အဖွဲ့ရဲ့ အလားအလာ
ဗိုလ်ချုပ်ကြီး မူတူး PPST က အနားယူလိုက်ရင် ခေါင်းဆောင်နေရာ မှာ KNU က ကိုယ်စားလှယ်မဟုတ်ပဲ အခြားတိုင်းရင်းသားလက်နက်ကိုင်အဖွဲ့ တခုခု က ခေါင်းဆောင်တာဝန်ယူလာမလား ဆိုတာလည်း စောကြော နေကြပါတယ်