د ملګرو ملتونو د کډوالو عالي کمېشنرۍ د افغان کشالې بېړنی حل وغوښت

افغانستان

د عکس سرچینه، AFP

د ملګرو ملتونو د کډوالو عالي کمېشنرۍ په افغانستان کې د جګړې له امله ورځ تر بلې د زیات شمېر بېځایه شوو او د جګړې ډېرېدو په اړه اندېښنه ښودلې او د افغان کشالې د بېړني حل غوښتنه یې کړې ده.

فیلپیو ګراندي خبرداری ورکړی، چې په افغانستان کې په زیاته کچه په اجباري توګه بېځایه شوي په دغه هېواد کې د سیاسي ماتې پایله ده.

عبدالصمد د هلمند د هغوو زرګونو کسانو له ډلې یو دی، چې وروستۍ جګړې د خپلې مېنې پرېښوېدو ته اړ کړي دي.

نوموړی وايي، په لښکرګاه کې جګړه کوڅه په کوڅه روانه ده او په وینا یې نیمه کورنۍ د خوندیتوب په موخه ولسوالۍ ته لېږلې ده.

د هلمند دغه اوسېدونکی وایي، لکه چې په هلمند کې جګړې زور اخیستی نو د خوراکي توکو بیې هم د پخوا پرتله لوړې شوي دي.

په افغانستان کې د جګړې د وروستۍ تېزې څپې له امله د دغه هېواد په ګوټ ګوټ کې ملکیان در په در شوي او ان ځینې یې پر وچ ډاګ شپې او ورځې سبا کوي.

په ملګرو ملتونو کې د کډوالو عالي کمېشنرۍ یوه کمېشنر ویلي، په افغانستان کې د جګړې له امله ورځ تر بلي په کور د ننه د بېځایه شوو شمېر زیاتېږي، چې په وینا یې ور ته اندېښمن دی.

فیلپیو ګراندي پر خپل ټویتر پاڼه لیکلي، په افغانستان کې د ننه د بېځایه شوو او هغه چې له هېواد وځي، شمېر یې مخ پر ډېرېدو دی.

دې Twitter پوسټ نه تېرشئ, 1
ایا له Twitter نه د منځپانګې اجازه شته؟

دې لیکنه کې له social media راخیستل شوي مواد شته.‌ له ښودلو وړاندې یې ستاسې اجازه پکار ده، ځکه ښایي‌کوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ

د ‍پوسټ Twitter پای, 1

د ملګرو ملتونو دغه لوړ پوړي چارواکي، په افغانستان کې د روانې جګړې د بېړني ختم غوښتنه کړې او په وینا یې که ژر تر ژر د روانه کشاله حل نه شي نو په زیاته کچه د بېځایه شوو شاهدان به واوسو.

بل خوا د افغانستان کډوالو چارو وزارت وايي، سږ د پروسږکال پرتله په کور د ننه د بېځایه شمېر دوه برابره ډېر شوي.

د دغه وزارت په وینا په تېرو ۷ میاشتو کې ۶۰۰ سوه زره کسان د خپلو کورونو پرېښودو ته اړ شوي دي.

په یاد وزارت کې په کور د ننه د بېځایه شوو برخې مشر مهر خدا صبار بي بي سي ته وویل، یوازې په تېره میاشتې څلور زره کورنۍ د جګړې له امله بېځایه شوي دي:

"په څو ولایتونو کې، لکه هرات، جوزجان، نیمروز، تخار او ځینو نورو کې د جګړې له امله له بېځایه شوو سره د وزارت او د نړیوالو مرسته کوونکو ادارو د سروې او د مرستې لړۍ دریدلې ده".

د افغان حکومت په وینا، په تېرو دوو کلونو کې د جګړې او وچکالۍ له امله کابو پنځه میلیون افغانان د خپلو مېنو پرېښودو ته اړ شوي دي.

څه موده مخکې ملګرو ملتونو ویلي وو، که په افغانستان کې جګړه و نه درېږي نو د یوه بشري ناورین د رامنځته کېدو احتمال شته.

د ویډیو تشریح،

"درد سره ژوند نشم کولی، کاشکي زه هم مړه وای"