جنرال مېکنزي: راتلونکي کې امریکا په افغانستان کې څلور لومړیتوبونه لري

د امریکايي پوځ مرکزي قومندانۍ قومندان، چې تېره ورځ يې افغانستان کې د امريکايي ځواکونو مشري هم په غاړه واخيسته وايي، راتلونکي کې به افغانستان کې د امريکا پام د ترهګرۍ ضد هڅو او د افغان ځواکونو پر ملاتړ ور ټول وي.

جنرال مېکنزي چې کابل کې يې د امريکا او ناټو ځواکونو د مخکېني قومندان جنرال سکاټ مېلر د دندې ختمېدو په دستوره کې وويل، د کابل هوايي ډګر امنيت او افغانستان کې د دېپلوماتیک حضور خوندي کول به هم له لومړيتوبونو وي.

جنرال مېکنزي به په افغانستان کې مېشت نه وي او ټاکل شوې افغانستان کې د امريکايي ځواکونو دا ماموريت له لرې واټنه وڅاري.

د مېکنزي په وینا، د علمیاتو د قومندې د ځای بدلول له افغانو سره د امریکا د ژمنتیا د بدلون په مانا نه بلکې یو پوځي بدلون دی.

جنرال مېکنزي کابل کې د واک لېږد لپاره جوړې شوې غونډې ته وویل،‌ امریکا به اجازه ورنه کړي چې افغانستان یو ځل بیا د ترهګرو پټنځای شي او له دې هېواده امریکا او متحدینو ته یې ګواښ پېښ شي.

هغه وویل چې په راتلونکې پړاو کې به موږ پر څلورو برخو تمرکز ولرو.

جنرال مېکنزي ټینګار وکړ چې امریکا په خطرناکو او سختو ورځو کې د افغانستان تر څنګ درېږي.

نوموړي یو ځل بیا ډاډګیرنه وکړه چې امریکا به په افغانستان کې خپل دیپلوماتیک فعالیت ته دوام ورکوي او د افغان حکومت او خلکو ملاتړ به کوي.

جنرال مېکنزي وویل، دی به افغانستان کې وضعیت څاري او د اړتیا پر وخت به د ترهګرۍ ضد عملیاتو مشري کوي.

دغه امریکايي جنرال وویل، د جنرال مېلر په مشرۍ کې له افغانستانه د بهرنیو ځواکونو د وتلو بهیر په امن او بریالي توګه تقریباً بشپړ دی او تر دې دمه میلیونونه ټنه تجهیزات او وسایل او زرګونه پوځیان له کومې پېښې پرته له افغانستان ایستل شوي.

د قومندان په توګه د سکاټ مېلر وروستۍ وینا

جنرال سکاټ مېلر غونډې ته وویل،‌ له افغانستانه ښو خاطرو او یادونو سره ځي.‌ نوموړي وویل، افغانستان به یې د پاتې ژوند لپاره په زړه او په فکر کې ځای ولري.‌

نوموړي د هغو هېوادونو هم مننه وکړه چې په تېرو شلو کالو کې یې د امریکا ترڅنګ افغان جګړه کې برخه اخیسته.

افغانستان کې د روان تاوتریخوالي په اړه سکاټ مېلر وویل:" زه یو له هغو پوځیانو یم چې طالبانو سره مې مخامخ خبرې کړې دي. ما دوی ته په ښکاره ټکو ویلي‌ چې پوځي اړخونه باید افغانستان کې د سیاسي جوړجاړي لپاره شرایط برابر کړي. موږ ټول پوهېږو چې د اوسني تاوتریخوالي په دوام سره به سیاسي جوړجاړي ته رسېدل ډېر ګران وي. تاوتریخوالی د افغانانو له هیلو سره په ټکر کې دی او باید ختم کړل شي".

جنرال مېلر د خپل ځایناستي جنرال مېکنزي لخوا یو ښه پوځي او ښه قومندان وبلل شو او افغانستان کې یې ماموریت او د نړیوالو ځواکونو مشري وستایل شوه.

جنرال مېکنزي وویل، د جنرال مېلر په مشرۍ کې له افغانستانه د بهرنیو ځواکونو د وتلو بهیر په امن او بریالي توګه تقریباً بشپړ دی او تر دې دمه میلیونونه ټنه تجهیزات او وسایل او زرګونه پوځیان له کومې پېښې پرته له افغانستان ایستل شوي.

جنرال مېکزني کابل کې جوړې شوې غونډې ته وویل،‌ له افغانستان د پوځیانو وتل له دې هېواد سره د امریکا د اړیکو د نوي څپرکي د پیل په معنا دي.

هغه زیاته کړه‌ افغانستان کې د امریکایي پوځیانو نوی ماموریت به له قطره قومانده کېږي او مهمه دنده به یې افغانستان کې د امریکا د سفارت او دیپلوماتانو ساتنه، د کابل هوایي ډګر امنیت، د افغان ځواکونو ملاتړ او مشوره او د ترهګرۍ ضد عملیات وي.

جنرال مېکنزي همدا راز په لوژیستیکي، مالي او تخنیکي برخو کې د افغان پوځ د ملاتړ یادونه وکړه.

یاده دې وي چې جنرال مېکنزي نن دوشنبه کابل کې له افغان ولسمشر محمد اشرف غني سره هم کتلي دي.

به دې اړه د ارګ اعلامیه کې راغلي: "په دې کتنه کې، د اړیکو د نوي فصل په چوکاټ کې د نوي فصل او د هیواد له امنیتي او دفاعي ځواکونو په ځانګړي ډول د افغانستان هوایي ځواکونو سره د امریکا متحدو ایالتونو د همکاریو په اړه بحث او خبرې وشوې".