'امریکا باید د افغانستان په بې پایه اوږده جګړه کې ښکېله پاتې نه شي'
د عکس سرچینه، AFP
د امریکا د ولسمشر جو بایډن دولت د ملي امنیت د موقتې ستراتیژۍ لارښود خپور کړی دی.
په دې لارښود کې د افغانستان په اړه راغلي، په پام کې نه ده چې د امریکا نوی دولت په یوه ناپایه جګړه کې، چې د زرګونو کسانو ژوند یې اخیستی، ښکېل پاتې شي، بلکې هڅه کوي چې په افغانستان کې د امریکا تر ټولو اوږده جګړه په مسئولانه ډول پای ومومي.
د ولسمشر بایډن د ادارې لخوا د امریکا د ملي امنیت لپاره په اعلان شوي لنډمهالي ستراتیژیک لارښود کې د افغان جګړې په تړاو ویل شوي، امریکا به تل پاتې جګړو کې چې ټریلیونونه ډالر لګښت پرې راځي او د زرګونو کسانو ژوند اخلي، نه ښکېلېږي.
دا ستراتیژي پر دې هم ټینګار کوي، چې ډاډ ترلاسه شي افغانستان بیا د ترهګرو لپاره پر خوندي ځای نه بدلېږي او په دې برخه کې د امریکا له متحدانو سره د ګډ کار ژمنه کوي.
خلیلزاد په کابل کې
په همدې حال کې، د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد کابل ته د خپل درې ورځني سفر په پای کې ویلي، افغان دولت او طالبان باید یوه سیاسي جوړجاړي ته د رسېدو او د دایمي اوربند ټینګېدو لپاره یوه لاره ومومي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ Twitter پای, 1
دی وايي، د یوې عادلانه او پایېدونکې سولې په موخه د یوه ګړندي خوځښت اړتیا لپاره کابل کې پراخ ملاتړ شته.
زلمی خلیلزاد زیاتوي چې د کابل د سفر پر مهال یې له افغان چارواکو، مدني فعالانو او د ښځو له استازو سره کتنې او سلامشورې ګټورې وې.
دا په امریکا کې واک ته د جو بایډن له رسېدو راوروسته افغانستان ته ښاغلي خلیلزاد لومړنی سفر و.
هغه د خپل دغه سفر په تړاو په خپرو کړو ټویټونو کې لیکلي، کابل کې یې د کتنو پرمهال د سولې بهیر د چټک پرمختګ لپاره پر ګڼو غوراویو او بدیلونو خبرې کړې دي.
د مشارکتي حکومت جوړېدو بحثونه
د ځینو لوېدیځوالو رسنیو په رپوټونو کې هم د امریکا د بهرنیو چارو وزارت د سرچینو په وینا راغلي، چې په وروستیو کې له افغان چارواکو سره د یوه مشارکتي حکومت د جوړېدو په ګډون پر بېلابېلو غوراویو بحثونه شوي دي.
ټاکل شوې ښاغلی خلیلزاد اوس له طالب استازو سره د خبرو لپاره دوحې ته ولاړ شي.
