الیکشن کمیشن نے وزیراعظم کو کہوٹہ کا دورہ اور وہاں ڈیم کا افتتاح کرنے سے روک دیا
وزیر اعظم شہباز شریف نے بدھ کو کہوٹہ میں ڈیم کا افتتاح کرنا تھا تاہم الیکشن کمیشن نے انھیں روک دیا ہے۔ یہ علاقہ پنجاب کے صوبائی حلقہ سات میں واقع ہے جہاں پر اگلے ماہ کی بیس تاریخ کو ضمنی انتخاب ہونا ہے۔
لائیو رپورٹنگ
time_stated_uk
یہ صفحہ اب مزید اپ ڈیٹ نہیں کیا جا رہا
مگر بی بی سی اردو کی لائیو کوریج جاری ہے۔ تازہ ترین خبریں آپ یہاں ملاحظہ کر سکتے ہیں۔
بریکنگالیکشن کمشین نے وزیراعظم کو کہوٹہ کا دورہ کرنے سے روک دیا
الیکشن کمیشن آف پاکستان نے وزیر اعظم شہباز شریف کو کہوٹہ کا دورہ کرنے سے روک دیا ہے۔
الیکشن کمیشن کے حکام نے اس ضمن میں وزیر اعظم کے پرنسپل سیکرٹری سے رابطہ کیا تھا۔
بتایا گیا ہے کہ الیکشن کمشن کی جانب سے یہ اقدام اس حلقے میں اگلے ماہ ہونے والے ضمنی انتخاب کے حوالے سے انتخابی قواعد وضوابط کی خلاف ورزی نہ ہونے کے لیے کیا ہے۔
وزیر اعظم شہباز شریف نے29 جون کو کہوٹہ میں ڈیم کا افتتاح کرنا تھا۔
جس جگہ پر وزیراعظم نے ڈیم کا افتتاح کرنا تھا یہ علاقہ پنجاب کے صوبائی حلقہ سات میں واقع ہے جہاں پر اگلے ماہ کی بیس تاریخ کو ضمنی انتخاب ہونا ہے۔
واضح رہے کہ اس سے قبل الیکشن کمیشن سابق وزیر اعظم عمران خان کو بلدیاتی انتخابات میں الیکشن مہم میں حصہ لینے کے لیے متعدد بار نہ صرف روکا بلکہ ان کو نوٹسز بھی جاری کیے لیکن سابق وزیر اعظم الیکشن کمیشن کے احکامات کو نظر انداز کرتے رہے۔
نیوٹرلز کو بتایا تھا کہ ملک سیاسی عدم استحکام کی بڑی قیمت ادا کرے گا۔۔۔ جس تیزی سے ملک نیچے گیا اس کی مثال نہیں ملتی: عمران خان
سابق وزیر اعظم عمران خان نے کہا ہے کہ انھوں نے نیوٹرلز کو بتایا تھا کہ اگر آپ نیوٹرل رہنا چاہتے ہیں تو بہت اچھی بات ہے مگر ملک سیاسی عدم استحکام کی بڑی قیمت ادا کرے گا کیونکہ اُن کی (حریف سیاسی جماعتوں) سے ملک نہیں سنبھالا جائے گا۔
عمران خان کا کہنا تھا کہ ان کی یہ بات آج سچ ثابت ہو رہی ہے کیونکہ گذشتہ دو ماہ میں پاکستان جس تیزی سے نیچے گیا ہے اس کی مثال نہیں ملتی۔
سابق وزیر اعظم عمران خان نے اسلام آباد میں نیوز کانفرنس سے خطاب کرتے ہوئے الزام عائد کیا کہ بجائے لوگوں کے حالات ٹھیک کرنے کے انھوں نے حکومت میں آ کر صرف اپنے اوپر 1100 ارب روپے کے کرپشن کیسز ختم کروائے اور اب وہ ان تمام اداروں کو تباہ کرنے کے درپے ہیں جو ان کی کرپشن پکڑ سکتے ہیں جیسا کہ ایف آئی اے۔
عمران خان کا کہنا تھا کہ ’ان تمام پارٹیوں کے اکھٹے ہونے کا مقصد صرف اپنے آپ کو این آر او دینا تھا۔‘
’آج لوگوں میں غصہ ہے کہ آپ نے انھیں پہلے مہنگائی اور معیشت کا نام لے کر اکھٹا کیا مگر اب کچھ اور کر رہے ہیں۔ عوام پوچھ رہے ہیں کہ دو ماہ میں ایسا کیا ہوا ہے کہ سب کچھ ہی نیچے چلا گیا۔ سٹاک مارکیٹ بیٹھ گئی، مہنگائی ریکارڈ سطح پر پہنچ گئی اور روزگار کے ذرائع ختم ہو گئے۔‘
عمران خان کا کہنا تھا کہ آج کراچی میں عوام سڑکوں پر نکلی ہوئی ہے اور انھیں پولیس تشدد کا سامنا ہے۔
’ایک سیاسی اور جمہوری حکومت لوگوں کو مسائل پر احتجاج کرنے پر ڈنڈے نہیں مارتی بلکہ انھیں آگاہ کرتی ہے کہ حکومت کن مسائل کا شکار ہے اور اس کا حل کیا ہے۔ کراچی میں لوڈ شیڈنگ جاری ہے جبکہ حقیقت یہ ہے کہ بجلی گھروں میں بجلی نہیں بن پا رہی کیونکہ دو ہی ماہ میں آج ان کے پاس نہ کوئلے کے پیسے ہیں نا ایل این جی کے۔‘
عمران خان نے کہا کہ ’ہم بھی آئی ایم ایف کے ساتھ ساڑھے تین سال پروگرام میں رہے۔ ہمیں بھی کہا جاتا تھا کہ پیٹرول کی قیمت اتنی کرو یا ڈیزل کی اتنی بڑھاؤ۔ مگر ہم نے پریشر برداشت کیا۔ ہم نے پیٹ کاٹ کر بجلی اور پیٹرول کی قیمت نہیں بڑھنے دی کیونکہ ہمیں پتا تھا کہ لوگوں کے حالات کیا ہیں۔‘
’موجودہ حکومت نے دو ماہ میں جتنی قیمتیں بڑھائیں اتنی ہمارے ساڑھے تین سال میں نہیں بڑھیں۔
بجائے لوگوں کے دکھ درد سننے کے اور ذہن استعمال کرنے کے لوگوں کے دکھ کیسے کم کریں یہ ان پر آنسو گیس پھینک رہے ہیں۔‘
انھوں نے کہا کہ ڈنڈے سے کبھی جمہوریت نہیں چلتی۔ انھوں نے دو جولائی کو اسلام آباد کے پریڈ گراؤنڈ میں پرامن احتجاجی ریلی کا اعلان کرتے ہوئے تمام شہریوں کو اپنے اپنے شہروں میں احتجاج کرنے کی اپیل کی ہے۔
بریکنگخاتون کی ہلاکت پولیس کی شیلنگ یا لاٹھی چارج سے نہیں ہوئی ہے: کراچی پولیس
کراچی پولیس کی جانب سے جاری بیان میں کہا گیا ہے کہ شہر میں دھرنے کے دوران ایک 70 سالہ خاتون کی زخمی ہو کر ہلاکت کی خبر غلط ہے ان کی موت طبعی طور پر ہوئی ہے۔
اس سے قبل ایدھی فاؤنڈیشن کی جانب سے یہ اطلاع موصول ہوئی تھی کہ ماڑی روڈ پر بجلی کی لوڈ شیڈنگ کے خلاف احتجاجی دھرنے کے دوران ایک خاتون ہلاک ہوئی ہیں اور ان کی لاش کو لیاری جنرل ہسپتال لے جایا جا رہا ہے۔
علاقے میں گذشتہ کئی گھنٹوں سے بجلی کی لوڈ شیڈنگ ہو رہی تھی۔
ایس ایس پی سٹی نے اپنے بیان میں بتایا ہے کہ مرحومہ کے لواحقین سے پوسٹ مارٹم کے لیے مذاکرات جاری ہیں۔
مظاہرین پولیس سے مطالبہ کر رہی ہے کہ دھرنے میں ہلاک ہونے والی عورت کی موت کے باعث کراچی الیکٹرک کے خلاف ایف آئی آر درج کی جائے۔
پولیس کا کہنا ہے کہ `واضح رہے کے مرحومہ کی ہلاکت پولیس کی شیلنگ یا لاٹھی چارج وغیرہ سے نہیں ہوئی ہے، ہمارے پاس فوٹیجز بھی موجود ہیں اس لیے من گھڑت افواہوں پر کان نہ دھریں۔‘
’عوام کی زندگی عذاب کرکے انھیں احتجاج کا بھی حق نہیں‘: شہباز گل
کراچی میں بجلی کی بندش کے خلاف احتجاج کرنے والے افراد پر سندھ پولیس کی جانب سے شیلنگ اور لاٹھی چارج کرنے پر پی ٹی آئی رہنما شہباز گل نے سندھ حکومت پر شدید تنقید کی ہے۔
انھوں نے سوشل میڈیا پر ٹویٹ کرتے ہوئے صوبائی حکومت اور سابق صدر کو تنقید کا نشانہ بنایا ہے۔
کراچی میں بجلی کی بندش کے خلاف شہریوں کا احتجاج، ماڑی پور روڈ میدان جنگ بن گیا
ریاض سہیل، نامہ نگار کراچی
بجلی کی بندش کے خلاف کراچی کے علاقے ماڑی پور روڈ پر احتجاج کرنے والے شہریوں پر پولیس نےلاٹھیاں برسائیں ہیں اور شیلنگ کی۔
پولیس شیلنگ کے بعد رینجرز اور پولیس نے لاٹھی چارج کرکے لوگوں سے بندرگاہ جانے والی سڑک ماڑی پور روڈ کو خالی کروا لیا۔
کراچی کے علاقے ماڑی پور پر بجلی کی طویل بندش کے خلاف شہری گزشتہ روز سے سراپا احتجاج ہیں جبکہ بندرگاہ کو جانے والی اہم شاہراہ ماڑی پور روڈ 20 گھنٹوں سے ٹریفک کے لیے بند ہے۔
انتظامیہ سے مذاکرات ناکام ہونے پر مظاہرین نے پولیس پر پتھراؤ کیا اور بجلی کی فراہمی تک احتجاج ختم کرنےسے انکار کر دیا۔
اس ضمن میں شدید احتجاج لیاری کے علاقوں میں دیکھا گیا جہاں شہر کی غریب مزدور آبادی رہتی ہے، تنگ گلیوں میں چھوٹے چھوٹے مکانات میں یہ لوگ آباد ہیں، اسحاق ہنگورو نامی شہری نے بی بی سی کو بتایا کہ پیر کو چار بجے انھوں نے احتجاج کا آغاز کیا تھا۔
وہ کہتے ہیں کہ ’چودہ سے پندرہ گھنٹے بجلی نہیں ہے اعلانیہ لوڈشینگ کے مطابق تین تین گھنٹے یعنی نو گھنٹے کی لوڈشیڈنگ تھی لیکن اب یہ سلسلہ برداشت سے باہر ہوگیا ہے، نہ صبح، نہ شام اور نہ رات کا خیال کیا جاتا ہے لوگ گھر میں سو نہیں پاتے جبکہ بجلی نہ ہونے کی وجہ سے پینے کا پانی تک دستیاب نہیں ہے۔‘
انھوں نے بتایا کہ پہلے جب بجلی کی عدم دستیابی پر وہ ماڑی پور روڈ بند کرتے تھے تو کے الیکٹرک بجلی بحال کردیتی تھی لیکن اس بار اس نے بالکل ہی پرواہ نہیں کی، پولیس، اسٹنٹ کمشنر اور رینجرز نے مذاکرات کرکے سڑک تو کھول دی ہے لیکن کے الیکٹرک کا کوئی افسر نہیں آیا۔
کے الیکٹرک کے ایک ترجمان نے بی بی سی کو بتایا کہ وہ معلومات جمع کر رہے ہیں اس کے بعد اپنا موقف بیان کریں گے۔
یاد رہے کہ گزشتہ بیس گھنٹوں سے احتجاج جاری ہے۔
کراچی میں درجے حرارت منگل کو بھی 36 سینٹی گریڈ ریکارڈ کیا گیا ہے، اس سے قبل کراچی کی بندرگاہ کو ملک سے جوڑنےوالی سڑک ماڑی پور پر احتجاج کی وجہ سے گاڑیوں کی قطاریں لگ گئیں تھیں اور کئی ٹرالر اور کنٹینرز کے علاوہ عام شہری بھی ٹڑیفک میں پھنس گئے تاہم پولیس اور رینجرز نے مظاہرین کو منشتر کرنے کے لیے لاٹھی چارج اور شیلنگ کا سہارا لیا۔
سندھ کے وزیر توانائی امتیاز شیخ کا کہنا ہے کہ غیر اعلانیہ لوڈشیڈنگ کی وجہ سے امن وامان کی صورتحال خراب ہو رہی ہے۔ ان کا کہنا ہے کہ وفاقی حکومت نیپرا سے منظور شدہ سبسیڈیذ کی رقم کی فوری ادائیگی کرے۔
صوبائی وزیر توانائی کا کہنا ہے کہ کے الیکٹرک کے پاس فرنس آئل خریدنے کی رقم نہ ہونے کی وجہ سے عوام کو لوڈشیڈنگ کے عذاب کا سامنا کرنا پڑ رہا ہے۔ کے الیکٹرک ہنگامی بنیادوں پر غیر اعلانیہ لوڈشیڈنگ کا خاتمہ کرے۔
امتیاز شیخ نے وزیر اعظم اور وزیر خزانہ سے کے الیکٹرک کے بقایا جات کی ادائیگی کی اپیل کی ہے۔
وزیر اعلیٰ پنجاب کے انتخاب کا معاملہ: ’عدالت کل دوبارہ انتخاب کی تاریخ مقرر کرے گی‘
پاکستان تحریک انصاف کے وکیل بیریسٹر علی ظفر کا کہنا ہے کہ عدالت کل وزیر اعلیٰ پنجاب کے دوبارہ انتخاب کے معاملے میں وقت بتائے گی۔
لاہور ہائی کورٹ کے باہر میڈیا سے بات کرتے ہوئے ان کا کہنا تھا کہ عدالت دوبارہ انتخابات کی تاریخ کا وقت دے گی۔ عدالت سے درخواست کی ہے کہ ہمیں اس ضمن میں دس دن کا وقت دے دیں تاکہ جو لوگ باہر گئے ہیں وہ واپس آ جائیں اور ووٹ کی تیاری کر لیں۔
ایک سوال کے جواب میں ان کا کہنا تھا کہ عدالت کی رولنگ ہے کہ آئین و قانون کے مطابق عدالت کی جانب سے بتائے گئے وقت پر جو لوگ بھی رکن اسمبلی ہوں گے وہ ووٹ ڈالنے کے اہل ہوں گے۔
بریکنگشمالی وزیرستان میں انسداد پولیو ٹیم پر حملہ، ایک پولیو ورکر، دو پولیس اہلکار ہلاک
بلال احمد، بی بی سی پشاور
صوبہ خیبرپختونخوا کے قبائلی ضلع شمالی وزیرستان کے علاقے دتہ خیل میں انسداد پولیو ٹیم پر نامعلوم افراد کی فائرنگ سے سکیورٹی پر معمور دو پولیس اہلکاروں سمیت ایک پولیو ورکر ہلاک ہو گیا ہے۔
پولیس کے مطابق لاشوں اور زخمیوں کو تحصیل ہسپتال دتہ خیل منتقل کر دیا گیا ہے۔ وزیر اعلیٰ خیبر پختونخوا کے آفس سے جاری ہونے والی پریس ریلیز میں اس واقعے کی مذمت کرتے ہوئے ہلاک ہونے والے پولیس اہلکاروں اور پولیو ورکر کے خاندانوں سے دلی ہمدردی کا اظہار کیا گیا۔
وزیر اعلیٰ خیبرپختونخوا محمود خان نے صوبائی پولیس کو اس واقعے میں ملوث عناصر کی فوری گرفتاری کرنے کے لیے ضروری اقدامات اٹھانے کی ہدایت کی ہے۔
ایمرجنسی آپریشن یونٹ کے ڈپٹی کوآرڈینیٹر ذیشان خان نے بی بی سی کو بتایا کہ خیبر پختونخوا کے 25 اضلاع میں 27 جون (پیر) سے پولیو کے قطرے پلانے کی مہم کا آغاز ہوا تھا۔ پانچ روز تک جاری رہنے والی اس مہم کا اختتام یکم جولائی کو ہونا ہے۔
اُن کے مطابق پولیو کے قطرے پلانے والی ٹیموں کی حفاظت کے لیے 14 ہزار پولیس اور سکیورٹی اہلکار تعینات کیے گئے ہیں۔
مفتاح اسماعیل: آج آئی ایم ایف سے میمورنڈم آف اکنامکس اینڈ فنانشل پالیسی کا مسودہ موصول ہوا ہے
پاکستانی حکومت کے آئی ایم ایف سے قرض معاہدہ میں اہم پیش رفت سامنے آئی ہے اور اب سے کچھ دیر قبل وزیر خزانہ مفتاح اسماعیل نے بتایا ہے کہ آج صبح ہمیں آئی ایم ایف سے میمورنڈم آف اکنامکس اینڈ فنانشل پالیسی کا مسودہ موصول ہو گیا ہے۔
انھوں نے بتایا کہ آئی ایم ایف نے ساتوں اور آٹھویں جائزے کا میمورنڈم پاکستان کو بھیجا ہے۔
آئی ایم ایف سے معاہدے کے قریب ہیں، دیوالیہ ہونے کا خطرہ ٹل چکا: شہباز شریف
وزیرِ اعظم شہباز شریف نے کہا ہے کہ پاکستان پر سے دیوالیہ ہونے کا خطرہ ٹل چکا ہے اور بین الاقوامی مالیاتی فنڈ (آئی ایم ایف) سے بہت جلد معاہدہ طے پا جائے گا۔
اسلام آباد میں ایک تقریب سے خطاب کرتے ہوئے اُنھوں نے کہا کہ گذشتہ حکومت نے مالدار افراد سے ٹیکس وصول کر کے عوام پر سے بوجھ کم نہیں کیا۔
اُن کا کہنا تھا کہ اُن کی حکومت نے صنعتی شعبوں کی آمدن پر ایک براہِ راست ٹیکس لگایا ہے۔ شہباز شریف نے دعویٰ کیا کہ اس کا بوجھ عوام پر منتقل نہیں ہو گا۔
وزیرِ اعظم نے کہا کہ پاکستان میں خوردنی تیل کا ایک بہت بڑا بحران پیدا ہونے جا رہا تھا لیکن اُنھوں نے انڈونیشیا سے خصوصی درخواست کی جس نے اپنے پاس تیل کی برآمد پر پابندی کے باوجود پاکستان کو خوردنی تیل فراہم کیا۔
شہباز شریف نے کہا کہ پوری دنیا میں گیس اور تیل کی قیمتوں میں اضافے کی وجہ سے پاکستان کے لیے بھی مشکلات ہیں۔
’جولائی میں گیس کے جہاز نہیں ملے کیونکہ ساری کی ساری یورپ نے خرید لی ہے، اس حوالے سے کوشش کی جا رہی ہے، ممکن ہے کہ لوڈ شیڈنگ کچھ دن جولائی میں بڑھے، پچھلی حکومت کو تین سے لے کر چھ ڈالر تک میں گیس مل رہی تھی مگر اُنھوں نے نہیں خریدی۔‘
اُنھوں نے عندیہ دیا کہ پاکستان افغانستان کے ذریعے کوئلہ حاصل کرے گا جس کے باعث ملک کو زرِ مبادلہ کی مد میں دو ارب ڈالر تک کی بچت ہونے کی توقع ہے۔
وزیرِ اعظم نے کہا کہ یہ کوئلہ روپوں میں خریدا جائے گا اور اس سے بجلی پیدا کی جائے گی۔
الیکشن کمیشن کو پنجاب اسمبلی میں پی ٹی آئی کی مخصوص نشستوں کا نوٹیفکیشن جاری کرنے کا حکم
عمر دراز ننگیانہ، نمائندہ بی بی سی اردو لاہور
لاہور ہائیکورٹ نے الیکشن کمیشن کا فیصلہ کالعدم قرار دیتے ہوئے پنجاب اسمبلی میں مخصوص نشستوں کا نوٹیفیکیشن جاری کرنے کا حکم جاری کیا ہے۔
واضح رہے کہ پنجاب اسمبلی میں حمزہ شہباز کو ووٹ دینے پر 25 پی ٹی آئی کے منحرف اراکین اسمبلی کی رکنیت معطل ہو گئی تھی جن میں سے پانچ مخصوص نشستوں پر منتخب ہوئے تھے۔
الیکشن کمیشن نے 20 نشستوں پر ضمنی الیکشن کا اعلان کرتے ہوئے فیصلہ کیا تھا کہ مخصوص نشستوں کا فیصلہ بھی ضمنی الیکشن کے بعد ہو گا جب کہ پی ٹی آئی کا موقف تھا کہ مخصوص نشستوں کا نوٹیفیکیشن فوری طور پر ہونا چاہیے۔
پی ٹی آئی کی درخواست پر لاہور ہائی کورٹ میں جسٹس شاہد وحید نے سماعت کی جس کے دوران تحریک انصاف کے وکیل بیرسٹر علی ظفر نے دلائل دیتے ہوئے کہا کہ منحرف ارکان کو ڈی سیٹ کرنے کے بعد الیکشن کمیشن ان نشستوں پر نوٹیفکیشن جاری کرنے کا پابند ہے۔
ان کا موقف تھا کہ ’سیاسی جماعتوں کی جانب سے دی گئی فہرست بدل نہیں سکتی جب کہ الیکشن کمیشن نے کہا کہ 20 سیٹیں خالی ہوئی ہیں، اس لیے پارٹیوں کی کل نشستیں بھی بدلی ہیں جو قانونی موقف نہیں۔‘
دوسری جانب ایڈووکیٹ جنرل پنجاب نے کہا کہ مخصوص نشستوں پر نوٹیفکیشن جنرل الیکشن کے بعد ہوتا ہے اور 20 نشستوں کی وجہ سے سیاسی جماعتوں کی پوزیشن بدل گئی ہے۔ ایڈووکیٹ جنرل پنجاب نے یہ بھی کہا کہ ’میرا تو خیال تھا کہ یہ لارجر بینچ کا معاملہ ہے۔‘
پارلیمنٹ کی قانون سازی کو بدنیتی نہیں کہا جا سکتا، اسلام آباد ہائی کورٹ
شہزاد ملک، نمائندہ بی بی سی اردو اسلام آباد
اسلام آباد ہائی کورٹ نے اوورسیز پاکستانیوں کے لیے ووٹنگ کے طریقہ کار پر آئینی ترمیم کے خلاف درخواست کو ناقابل سماعت قرار دیتے ہوئے مسترد کر دیا ہے۔
اسلام آباد ہائی کورٹ میں چیف جسٹس اطہر من اللہ نے اووسیز پاکستانیوں کے ووٹ پر پارلیمنٹ کی قانون سازی کے خلاف دائر درخواست پر ریمارکس دیے کہ ’امید ہے کہ الیکشن کمیشن اپنی آئینی ذمہ داری پوری کرے گا۔‘
اس سے قبل درخواست گزار کے وکیل نے موقف اپنایا کہ ’اوورسیز پاکستانیوں کے ووٹ کا حق تسلیم کیا جاتا ہے لیکن دیا نہیں جاتا۔‘
انھوں نے کہا کہ ’قیامت تک اورسیز پاکستانیوں کو ووٹ کا حق نہیں دیا جائے گا۔‘
درخواست گزار کے وکیل نے الزام عائد کیا کہ ’پارلیمنٹ نے بدنیتی سے اوورسیز پاکستانیوں کے ووٹ کا معاملہ دوبارہ صفر پر پہنچا دیا‘ جس پر چیف جسٹس اطہر من اللہ نے برہمی کا اظہار کرتے ہوئے ریمارکس دیے کہ ’پارلیمنٹ کی قانون سازی کو بدنیتی نہیں کہا جاسکتا۔‘
چیف جسٹس اطہر من اللہ نے درخواست گزار وکیل کے دلائل سن کر درخواست خارج کی۔
’الیکشن کمیشن پر کسی کو بھی اعتبار نہیں‘
سابق وزیر اعظم عمران خان نے الیکشن کمیشن پر جانبداری کا الزام لگاتے ہوئے کہا ہے کہ اس پر ’کسی کو اعتبار نہیں ہے۔‘
لاہور کے حلقہ پی پی 168 میں ورکرز کنونشن سے خطاب کرتے ہوئے ان کا کہنا تھا کہ ضمنی انتخابات میں عوام نے ’ضمیر بیچنے والوں سے بدلا لینا ہے اور لوٹوں کو شکست دینی ہے۔‘
ان کا کہنا تھا کہ ’یہ صرف ایک حلقے کا نہیں پاکستان کا الیکشن ہے۔ چوروں کو ہم پر مسلط کیا گیا۔ موجودہ حکومت ناجائز اور امپورٹڈ ہے۔
’لوٹے کسی صورت اپنے حلقوں میں کامیاب نہیں ہوں گے۔‘
عمران خان نے آئندہ ہفتے کے دوران اسلام آباد کے پریڈ گراؤنڈ میں جلسے کا بھی اعلان کیا ہے۔
سندھ میں بلدیاتی انتخابات کے پہلے مرحلے کے دوران پُرتشدد واقعات سے دو افراد ہلاک
الیکشن کمیشن نے اتوار کو سندھ کے 14 اضلاع میں بلدیاتی انتخابات کا پہلا مرحلہ اور خیبر پختونخوا میں سوات حلقہ پی کے 7 میں ضمنی انتخاب کروایا ہے جہاں پولنگ صبح آٹھ بجے سے شام پانچ بجے تک بغیر وقفے جاری رہی تاہم سندھ کے بعض پولنگ سٹیشنز میں ہنگامہ آرائی کے باعث پولنگ کا عمل رُکا اور یہاں اتنا ہی دورانیہ بڑھانے کا فیصلہ کیا گیا۔
سندھ میں بلدیاتی انتخابات کے پہلے مرحلے میں مختلف اضلاع میں پولنگ کے دوران ہنگامہ آرائی، فائرنگ اور پُرتشدد واقعات ہوئے جن میں کم از کم دو اموات اور ایک درجن سے زائد افراد کے زخمی ہونے کی اطلاعات سامنے آئیں۔
مقامی ذرائع ابلاغ کے مطابق سکھر کے علاقے روہڑی کے دبر پولنگ سٹیشن پر فائرنگ سے ایک شخص ہلاک ہوا جبکہ سانگھڑ میں ٹنڈو آدم میں بھی جھگڑے کے دوران ایک شخص ہلاک ہوا۔
ٹنڈو آدم میں تحریک انصاف کے ڈویژنل صدر مشتاق جنیجو کا کہنا ہے کہ ’پرتشدد واقعے سے پارٹی کے امیدوار اصغر گنڈاپور کے بھائی قیصر کی وفات ہوئی ہے۔‘
ایم کیو ایم کے رہنما وسیم اختر نے سندھ کے بلدیاتی انتخابات میں دھاندلی کا الزام لگاتے ہوئے کہا ہے کہ ’ہم پیپلز پارٹی کے اتحادی ہیں اور ہم ان سے سوال کرتے ہیں کہ ان کی بھی ذمہ داری ہے کہ کس طرح کے الیکشن کروائے جا رہے ہیں۔‘ انھوں نے مطالبہ کیا کہ الیکشن کمیشن سندھ میں بلدیاتی الیکشن کو فوری طور پر رکوائے اور امن کی صورت حال کو دیکھنے کے لیے فوج بلوائی جائے۔
ادھر پولنگ کے بعد گنتی کا عمل جاری ہے۔ غیر حتمی اور غیر سرکاری نتائج کے مطابق 10 اضلاع میں پیپلز پارٹی کو برتری حاصل ہے۔
خیال رہے کہ بلدیاتی انتخابات کا دوسرا مرحلہ حیدرآباد اور کراچی میں 24 جولائی کو ہوگا۔
ترجمان الیکشن کمیشن کے مطابق انتخابات کو صاف و شفاف بناتے کے لیے ضروری اقدامات کیے گئے تھے۔
سوات این اے 7 کے ضمنی انتخاب میں پی ٹی آئی امیدوار کو برتری حاصل
دوسری طرف غیر حتمی اور غیر سرکاری نتائج کے مطابق سوات حلقہ این اے 7 کے ضمنی الیکشن میں تحریک انصاف کے امیدوار فضل مولا کو برتری حاصل ہے جبکہ اے این پی کے حسین احمد دوسرے نمبر پر ہیں۔
ایم کیو ایم کا سندھ میں بلدیاتی الیکشن رکوانے کا مطالبہ، دھاندلی کے الزامات
ایم کیو ایم کے رہنما وسیم اختر نے ایک پریس کانفرنس سے خطاب کرتے ہوئے سندھ کے بلدیاتی انتخابات میں دھاندلی کا الزام لگایا ہے۔
انھوں نے کہا ہے کہ دھاندلی کا بازار گرم ہے اور جس طرح کا ماحول ہے اس میں صاف شفاف الیکشن نہیں ہو سکتا۔
انھوں نے کہا کہ ہم پیپلز پارٹی کے اتحادی ہیں اور ہم ان سے سوال کرتے ہیں کہ ان کی بھی ذمہ داری ہے کہ کس طرح کے الیکشن کروائے جا رہے ہیں۔
وسیم اختر نے مطالبہ کیا کہ الیکشن کمیشن سندھ میں بلدیاتی الیکشن کو فوری طور پر رکوائے اور امن کی صورت حال کو دیکھنے کے لیے فوج بلوائی جائے۔
سندھ بلدیاتی انتخابات: پنوعاقل میں ہنگامہ آرائی کرنے پر 13 افراد گرفتار
صوبہ سندھ کے 14 اضلاع میں بلدیاتی انتخابات کے پہلے مرحلے میں آج ووٹ ڈالے جا رہے ہیں جہاں الیکشن کمشین کے مطابق پنو عاقل میں ہنگامہ آرائی کرنے پر 13 افراد گرفتار کیا گیا ہے۔
الیکشن کمیشن کا کہنا ہے کہ کسی کو بھی الیکشن میں مداخلت نہپیں کرنے دی جائے گی۔
سعودی عرب کی جانب سے آرمی چیف جنرل باجوہ کے لیے ’آرڈر آف شاہ عبدالعزیز‘ کا اعزاز
سعودی ولی عہد محمد بن سلمان نے پاکستان کے آرمی چیف جنرل قمرجاوید باجوہ کو ’آرڈر آف کنگ عبدالعزیز‘ ایوارڈ سے نوازا ہے۔
سعودی خبر رساں ایجنسی واس الأخبار الملكية کے مطابق ولی عہد شہزادہ محمد بن سلمان نے سعودی عرب اور پاکستان کے درمیان تعلقات کو مضبوط اور مستحکم کرنے میں جنرل باجوہ کی نمایاں کوششوں کو سراہتے ہوئے انھیں ’کنگ عبدالعزیز میڈل آف ایکسیلنٹ کلاس‘ سے نوازا ہے۔
جنرل باجوہ گذشتہ روز سعودی عرب کے دورے پر پہنچے تھے۔
بلاول بھٹو زدراری: ہمارے مخالفین مسلسل ہارنے کے بعد مایوس ہو رہے ہیں اور تشدد کی دھمکیاں دے رہے ہیں
صوبہ سندھ کے 14 اضلاع میں بلدیاتی انتخابات کے پہلے مرحلے میں آج ووٹ ڈالے جا رہے ہیں۔ اس حوالے سے پاکستان پیپلز پارٹی کے چیئرمین بلاول بھٹو زدراری کا کہنا ہے کہ ہمارے مخالفین مسلسل ہارنے کے بعد مایوس ہو رہے ہیں اور تشدد کی دھمکیاں دے رہے ہیں۔
انھوں نے ٹویٹ کیا کہ ’میں اپنے کارکنان سے کہتا ہوں پرامن رہیں اور اشتعال میں نہ آئیں، ووٹ اور جمہوریت ہمارا انتقام ہے۔‘
سندھ بلدیاتی انتحابات: عمران خان کا پیپلز پارٹی پر امیدواروں کو ہراساں کرنے کا الزام
صوبہ سندھ کے 14 اضلاع میں بلدیاتی انتخابات کے پہلے مرحلے میں آج ووٹ ڈالے جا رہے ہیں۔
چیئرمین پی ٹی آئی عمران خان نے الزام لگایا ہے کہ پیپلز پارٹی کی جانب سے ’ہمارے امیدواروں کو ہراساں کرنے اور سپریم کورٹ کےاحکامات کی روشنی میں آرٹیکل140-A کے تحت اختیارات کی مقامی نمائندوں تک منتقلی سے گریز کے باوجود ہم حصہ لے رہے ہیں۔‘
انھوں نے سندھ کے لوگوں سے اپیل کی کہ پی ٹی آئی کے امیدواروں کو ووٹ دیں۔
سندھ بلدیاتی انتخابات: 14 ضلعوں میں مانیٹرنگ سخت کر دی گئی ہے، الیکشن کمیشن
صوبہ سندھ کے 14 اضلاع میں بلدیاتی انتخابات کے پہلے مرحلے میں آج ووٹ ڈالے جا رہے ہیں۔
الیکشن کمیشن کا کہنا ہے کہ 14 اضلاع میں مانیٹرنگ سخت کر دی گئی ہے اور اسلام آباد میں مرکزی کنٹرول روم کے علاوہ صوبائی الیکشن کمشنر سندھ کے دفتر میں بھی مانیٹرنگ سیل قائم کیا گیا ہے۔