సౌరవ్ గంగూలీ: పుకార్లకు చెక్ పెట్టిన దాదా

సౌరవ్ గంగూలీ చేసిన ట్వీట్ పై వచ్చిన స్పందనలకు, పుకార్లకు చెక్ పెడుతూ ఒక ప్రకటన చేశారు.

ప్రపంచవ్యాప్తంగా పని చేసే విద్యకు సంబంధించిన యాప్‌ను లాంచ్ చేసినట్లు సౌరవ్ గంగూలీ ప్రకటించినట్లు ఏఎన్ఐ వార్తాసంస్థ పేర్కొంది.

భారతీయ క్రికెట్ టీమ్ మాజీ కెప్టెన్ సౌరవ్ గంగూలీ బుధవారం చేసిన ట్వీట్ పలు ఊహాగానాలకు దారి తీస్తోంది.

ఆయన రాజకీయాల్లోకి అడుగు పెడతారేమోననే ఊహాగానాలు చేస్తున్నారు. గంగూలీ చేసిన ట్వీట్ లో ఆయన భవిష్య ప్రణాళికల గురించి స్పష్టంగా చెప్పలేదు. కానీ, ఆయన చేయబోయే పని ప్రజలకు ఉపయోగపడుతుందని మాత్రం పేర్కొన్నారు.

"1992లో మొదలైన నా క్రికెట్ ప్రయాణానికి 30 సంవత్సరాలు పూర్తయ్యాయి. అప్పటి నుంచి క్రికెట్ నాకు చాలా ఇచ్చింది. ముఖ్యంగా మీ అందరి సహకారం లభించింది. ఈ స్థానానికి చేరేందుకు నా ప్రయాణంలో నాకు సహకరించిన, మద్దతు తెలిపిన ప్రతి ఒక్కరికీ ధన్యవాదాలు తెలుపుతున్నాను. చాలా మందికి సహాయపడే విధంగా ఉండే ఒక కొత్త పనిని మొదలుపెట్టాలని అనుకుంటున్నాను. జీవితంలో ఈ కొత్త అధ్యాయంలోకి అడుగుపెడుతున్న సందర్భంలో మీరందరూ మునుపటి మాదిరిగానే నాకు సహకారం అందిస్తారని ఆశిస్తున్నాను" అని అంటూ సౌరవ్ గంగూలీ ట్వీట్ చేశారు.

అయితే, సౌరవ్ గంగూలీ బీసీసీఐ పదవికి రాజీనామా చేయలేదని బీసీసీఐ కార్యదర్శి జయ్ షా ఏఎన్‌ఐకి చెప్పారు.

ప్రపంచ బాక్సింగ్ ఛాంపియన్‌షిప్‌లో పతకాలను గెలుచుకున్న మహిళా బాక్సర్లను భారత ప్రధాని మోదీ బుధవారం కలిశారు.

ప్రధాని కలిసిన వారిలో నిఖత్ జరీన్, మనీషా మౌన్, పర్వీన్ హూడా ఉన్నారు.

BBCCopyright: BBC

అవినీతి నిరోధకం కోసమంటూ ఏపీ ప్రభుత్వం కొత్త యాప్ ని ప్రవేశపెట్టింది. ‘ఏసీబీ 14400’ పేరుతో మొబైల్ యాప్ అందుబాటులోకి తీసుకొచ్చింది.ఈ యాప్ ని ఏపీ ముఖ్యమంత్రి వైఎస్ జగన్ ఆవిష్కరించారు. రాష్ట్రంలో అవినీతిని అరికట్టేందుకు ఇది ఉపయోగపపడుతుందని ఆయన ఆశాభావం వ్యక్తం చేశారు.

"అధికారంలో వచ్చిన నాటి నుంచి అవినీతిని అదుపు చేసేందుకు ప్రయత్నిస్తున్నాం.ఈ దిశగా అనేక కార్యక్రమాలు చేపట్టాం. చరిత్రలో ఎప్పుడూలేని విధంగా, దేశంలో ఏ రాష్ట్రంలో లేని విధంగా రూ.1.41లక్షల కోట్ల మొత్తాన్ని లాంటి అవినీతి లేకుండా, పక్షపాతం లేకుండా నేరుగా లబ్ధిదారుల ఖాతాల్లోకి అత్యంత పారదర్శకంగా పంపించాం" అంటూ సీఎం ఈ సందర్భంగా వ్యాఖ్యానించారు.

ఈ యాప్ ని ఉపయోగించి అవినీతిని ఏరిపారేయాల్సిన అవసరముందని అభిప్రాయపడ్డారు. అవినీతి నిరోధానికి ఇదో విప్లవాత్మక మార్పు అంటూ వ్యాఖ్యానించారు. అవినీతి లేని పాలన అందించడమే తమ లక్ష్యం అన్నారు

"ఇక నుంచి ఎక్కడైనా, ఎవరైనా కూడా.. కలెక్టరేట్‌ అయినా, ఆర్డీఓ కార్యాలయం అయినా, సబ్‌రిజిస్ట్రార్‌ ఆఫీసు అయినా, మండల కార్యాలయం అయినా, పోలీస్‌స్టేషన్‌ అయినా, వాలంటీర్, సచివాలయం, 108, 104 సర్వీసులు అయినా.. ఎవరైనా ఎక్కడైనా కూడా లంచం అడిగితే.. ఎవరైనా చేయాల్సింది ఒక్కటే... తమ చేతుల్లోని ఫోన్‌లోకి ఏసీబీ 14400 యాప్‌ను డౌన్లోడ్‌ చేసి... బటన్‌ ప్రెస్‌చేసి వీడియోద్వారా కాని, ఆడియోద్వారా కాని సంభాషణను రికార్డు చేయండి.. ఆ డేటా నేరుగా ఏసీబీకి చేరుతుంది" అంటూ ఆయన వివరించారు.

BBCCopyright: BBC

యాప్ పనిచేసే విధానం..

• సీఎంవో అధికారికంగా వెల్లడించిన సమాచారం ప్రకారం..
• గూగుల్ ప్లే స్టోర్ నుంచి ఈ యాప్ డౌన్ లోడ్ చేసుకోవచ్చు.
• త్వరలో ఐఓఎస్‌ వెర్షన్‌లోనూ యాప్‌ను సిద్ధంచేస్తున్నారు.
• యాప్‌ డౌన్లోడ్‌ చేయగానే మొబైల్‌ నంబర్‌కు ఓటీపీ
• ఓటీపీ రిజిస్టర్‌ చేయగానే వినియోగానికి యాప్‌ సిద్ధమవుతుంది.
• యాప్‌లో 2 కీలక ఫీచర్లు ఉంటాయి.
• యాప్‌ద్వారా అవినీతి వ్యవహారానికి సంబంధించిన ఆడియో, వీడియో, ఫొటోలనునేరుగా లైవ్‌రిపోర్ట్‌ ఫీచర్‌ను వాడుకుని అక్కడికక్కడే ఫిర్యాదు చేసే అవకాశం ఉంటుంది.
• లాడ్జ్‌ కంప్లైంట్‌ ఫీచర్‌ ద్వారా అవినీతి వ్యవహారానికి సంబంధించి.. ఫిర్యాదుకుతనదగ్గరున్న డాక్యుమెంట్లను, వీడియో, ఆడియో, ఫొటో ఆధారాలను ఏసీబీకి పంపించే అవకాశం కుడా అందుబాటులో ఉంది.
• ఫిర్యాదు రిజిస్టర్‌ చేయగానే మొబైల్‌ ఫోన్‌కు రిఫరెన్స్‌ నంబరు
• ఆ నంబర్ ఆధారంగా కంప్లైంట్ స్టేటస్ అప్ డేట్ అవుతుంది.

ANICopyright: ANI

బాలీవుడ్ నటుడు అక్షయ్‌కుమార్ నటించిన ‘సామ్రాట్ పృథ్వీరాజ్ చౌహాన్’ హిందీ సినిమా జూన్ 3వ తేదీన థియేటర్లలో విడుదల కానుంది. పృథ్వీరాజ్ చౌహాన్ పాత్రలో అక్షయ్ కుమార్ నటించిన ఈ సినిమాకు డాక్టర్ చంద్ర ప్రకాష్ ద్వివేది దర్శకత్వం వహించారు.

ఈ సినిమా ప్రొమోషన్‌లో భాగంగా ఏఎన్ఐ వార్తా సంస్థకు ఇచ్చిన ఇంటర్వ్యూలో అక్షయ్‌కుమార్ మాట్లాడుతూ.. దురదృష్టవశాత్తూ పృథ్వీరాజ్ చౌహాన్ గురించి పాఠ్యపుస్తకాల్లో రెండు మూడు వాక్యాలు మాత్రమే రాశారని అభిప్రాయపడ్డారు.

‘‘ఆక్రమణదారుల గురించి చాలా రాశారు. కానీ మన రాజులు, చక్రవర్తులు ఒక్కొక్కరి గురించి రెండు లైన్లు మాత్రమే రాశారు. పృథ్వీరాజ్ గురించి చంద్రప్రకాష్ నాకు చెప్పటం మొదలుపెట్టినపుడు ఇంకా చాలా విషయాలు ఉన్నాయని నాకు అర్థమైంది. ఈ విషయాలన్నీ నిజమే కదా, కల్పితం కాదు కదా అని నేను ఆయనను అడిగాను. ఆయన నాకు మొత్తం చెప్పారు’’ అని అక్షయ్ పేర్కొన్నారు.

ప్రధానమంత్రి నరేంద్రమోదీతో తన ఇంటర్వ్యూ గురించి కూడా అక్షయ్ ప్రస్తావించారు. ఒక సామాన్య పౌరుడిగా తను ప్రధానిని ప్రశ్నించినట్లు చెప్పారు. ‘‘ప్రధాని ఏ వాచీ ధరిస్తారనేది తెలుసుకోవాలని నేను కోరుకున్నా. విధానం గురించి ప్రధానితో మాట్లాడే పని నాది కాదు’’ అని ఆయన వ్యాఖ్యానించారు.

ఈ సినిమా కోసం పృథ్వీరాజ్ రాసో, ఇతర జానపద గేయాల సాయం తీసుకున్నట్లు చంద్ర ప్రకాష్ ద్వివేది చెప్పారు. ఈ సినిమాకు చాలా కాలం వరకూ నిర్మాత ఎవరూ దొరకలేదని తెలిపారు.

@BJP4TelanganaCopyright: @BJP4Telangana

రానున్న హిమాచల్ ప్రదేశ్, గుజరాత్ అసెంబ్లీ ఎన్నికలను దృష్టిలో పెట్టుకుని భారతీయ జనతా పార్టీ జూలై 2, 3 తేదీల్లో హైదరాబాద్ నగరంలో జాతీయ కార్యవర్గ సమావేశం నిర్వహించనుందని ఏఎన్ఐ వార్తా సంస్థ తెలిపింది.

ఏఎన్ఐ కథనం ప్రకారం.. రెండు రోజుల పాటు జరిగే ఈ భేటీలో ప్రధానమంత్రి నరేంద్రమోదీ, కేంద్ర హోంమంత్రి అమిత్ షా, బీజేపీ అధ్యక్షుడు జె.పి.నడ్డా, రక్షణ మంత్రి రాజ్‌నాథ్ సింగ్ సహా బీజేజీ జాతీయ కార్యవర్గ సభ్యులు పాల్గొననున్నారు.

సాధారణంగా ప్రతి మూడు నెలలకు ఒకసారి జరిగే బీజేపీ జాతీయ కార్యవర్గ సమావేశం కోవిడ్ ఆంక్షల వల్ల కొంత కాలంగా జరగలేదు. 2021 నవంబర్‌లో దిల్లీలో జరిగిన కార్యవర్గ భేటీ అనంతరం మళ్లీ ఈ ఏడాది జూలైలో హైదరాబాద్‌లో ఈ భేటీ జరుగబోతోంది.

రాబోయే ఎన్నికల్లో పార్టీ గెలుపు అవకాశాలు, వ్యూహాల గురించి, సంస్థాగత వృద్ధి, 2024 సార్వత్రిక ఎన్నికలకు సన్నద్ధత తదితర అంశాలపై ఈ సమావేవంలో చర్చించనున్నారు.

@BJP4TelanganaCopyright: @BJP4Telangana

అయితే.. 2023 చివర్లో అసెంబ్లీ ఎన్నికలు జరుగనున్న తెలంగాణలో దూకుడుగా ముందుకెళుతున్న బీజేపీ.. తన జాతీయ కార్యవర్గ సమావేశానికి వేదికగా తెలంగాణ రాజధాని హైదరాబాద్‌ను ఎంచుకోవటం చాలా ముఖ్యమైన కీలకమైన అంశం.

ఇటీవల తెలంగాణలో ఒక బహిరంగ సభలో మాట్లాడిన ప్రధాని మోదీ.. రాష్ట్రంలో బీజేపీకి మంచి అవకాశాలు ఉన్నాయని చెప్పారు. తెలంగాణలో కేసీఆర్‌ది రాచరిక కుటుంబ పాలన అంటూ విమర్శించారు.

బీజేపీ జాతీయ అధ్యక్షుడు జె.పి.నడ్డా, కేంద్ర హోంమంత్రి అమిత్ షాలు కూడా ఇటీవల తెలంగాణ పర్యటనల్లో కేసీఆర్ పాలనను విమర్శిస్తూ.. తెలంగాణ మార్పు కోసం చూస్తోందని, బీజేపీకి ఒక అవకాశం ఇవ్వవచ్చునని పేర్కొన్నారు.

మరోవైపు తెలంగాణ ముఖ్యమంత్రి, తెలంగాణ రాష్ట్ర సమితి అధినేత కె.చంద్రశేఖరరావు కూడా కేంద్ర ప్రభుత్వం మీద, ప్రధానమంత్రి మీద తీవ్ర విమర్శలు ఎక్కుపెడుతున్నారు. బీజేపీ యేతర, కాంగ్రెసేతర కూటమిని ఏర్పాటు చేయటానికి ప్రతిపక్షాలు అధికారంలో ఉన్న రాష్ట్రాల్లో పలువురు నేతలతో భేటీ అవుతున్నారు.

EPACopyright: EPA

మూడు రోజుల పసికందును రూ. 3 లక్షలకు అమ్ముతామంటూ వాట్సాప్‌లో అమ్మకానికి పెట్టిన ఉదంతం కలకలం రేపింది.

చిన్నారిని అమ్ముతామంటూ ఓ ఆర్‌ఎంపీ చేసిన వాట్సాప్ పోస్ట్ వైరల్ అయ్యింది. చివరకు అతన్ని పోలీసులు అరెస్ట్ చేశారు.

ఎన్టీఆర్ జిల్లా జి.కొండూరుకి చెందిన ఆర్‌ఎంపీ అమృతరావు ఓ పసికందును అమ్మేందుకు చేసిన ప్రయత్నాన్ని దిశ పోలీసులు అడ్డుకున్నారు. అతన్ని అదుపులోకి తీసుకుని కేసు నమోదు చేశారు.

ఆ చిన్నారి ఎవరు, అమ్మకానికి సిద్ధపడడానికి కారణాలపై దర్యాప్తు సాగుతోందని పోలీసులు చెబుతున్నారు.

UGCCopyright: UGC

ఆంధ్రప్రదేశ్‌లోని విజయవాడలో మరో హత్య జరిగింది. నగరంలోని గురు నానక్ కాలనీలో బుధవారం తెల్లవారుజామున ఓ ఫుట్‌బాల్ ఆటగాడు హత్యకు గురయ్యాడు.

గుణదాల ప్రాంతంలోని కొందరు దండుగులు ఈ హత్యకు పాల్పడినట్టు పటమట పోలీసులు అనుమానిస్తున్నారు. కేసు నమోదు చేసి దర్యాప్తు చేస్తున్నామని పటమట పోలీస్ ఇన్‌స్పెక్టర్ తెలిపారు.

నగరానికి చెందిన ఆకాష్ ఫుట్‌బాల్ ఆటగాడిగా గుర్తింపు పొందాడు. ఇటీవల స్థానికంగా వివిధ పోటీల్లో రాణిస్తున్నాడు. అయితే ఆకాష్‌తో వివాదానికి దిగిన గుణదల గంగిరెద్దుల దిబ్బ ప్రాంతానికి చెందిన యువకులు ఈ హత్యకు పాల్పడి ఉంటారనే అనుమానాలు వ్యక్తమవుతున్నాయి.

ఘటనా స్థలాన్ని పోలీస్ అధికారులు పరిశీలించారు. కొన్ని ఆధారాలు లభించినట్టు చెబుతున్నారు. పోలీసులు నిందితుల కోసం గాలింపు చర్యలు చేపట్టినట్టు విజయవాడ పోలీస్ కమిషనర్ కాంతిలాల్ రాణా తెలిపారు.