Merz ashinda kura ya kuwa kansela Ujerumani baada ya kupoteza hapo awali
Chanzo cha picha, Getty Images
Maelezo ya picha, Kura ya pili ilikubaliwa Jumanne mchana, saa chache baada ya kushindwa kwa Merz
Kiongozi wa chama cha Conservative Friedrich Merz ameshinda kura ya ubunge kuwa kansela ajaye wa Ujerumani katika jaribio la pili.
Merz hapo awali alikuwa amepungukiwa na kura sita kutoka kwa wingi aliohitaji Jumanne asubuhi - pigo kubwa kwa heshima yake na kushindwa kusikokuwa na kifani katika historia ya Ujerumani baada ya vita.
Kwa vile ilikuwa kura ya siri katika Bundestag yenye viti 630, hakukuwa na dalili ya yeyote ambaye alikuwa amekataa kumuunga mkono - iwe wabunge kutoka kwa mshirika wake wa mrengo wa kushoto au wahafidhina wake mwenyewe.
Baada ya saa kadhaa za sintofahamu katika bunge la Bundestag, vyama na rais wa Bundestag walikubaliana kuandaa kura ya pili, ambayo Merz alishinda kwa kura 325, ikiwa ni kura tisa zaidi.
Kardinali wa Kenya kukosa kura ya kumchagua papa mpya kwa sababu za kiafya
Chanzo cha picha, Reuters
Maelezo ya picha, Kadinali John Njue alistaafu kama Askofu Mkuu wa Nairobi mnamo 2021
Kanisa Katoliki nchini Kenya limejibu wasiwasi wake kwamba kadinali pekee wa nchi hiyo hatashiriki katika uchaguzi wa papa ajaye kwa sababu alikuwa hajaombwa kuhudhuria.
Kufuatia kifo cha Papa Francis mwezi uliopita, viongozi wakuu wa Kanisa Katoliki, wanaojulikana kama makadinali, ambao wana umri wa chini ya miaka 80, wanastahili kumchagua mrithi wake.
Wanatarajiwa kuanza kukutana mjini Vatican siku ya Jumatano, lakini Kadinali wa Kenya John Njue, 79, alinukuliwa katika gazeti la Kenya akisema kwamba hakuwa amealikwa na hajui kwa nini.
Maafisa wa Kikatoliki nchini Kenya baadaye walisema kwamba alikuwa amealikwa lakini hakuweza kwenda kwa sababu ya afya mbaya.
"Ingawa [kardinali] anastahili kushiriki na alialikwa rasmi... kutokana na hali yake ya sasa ya afya [hataweza] kusafiri hadi Roma," taarifa iliyotiwa saini na Askofu Mkuu Philip Anyolo ilisema.
"Pia tuendelee kumuombea afya njema Mwadhama John Kardinali Njue." Askofu mkuu hakueleza masuala ya afya zaidi.
Taarifa ya Jumanne ya dayosisi kuu ya Nairobi ilibainisha kuwa ilikuwa ikijibu wasiwasi kuhusu ushiriki wa Kadinali Njue na "maswali mbalimbali" kuhusu iwapo atakuwa kwenye mkutano wa makadinali, unaojulikana kama conclave.
Gazeti la Daily Nation lilikuwa limemnukuu akisema kuwa hakuwa amealikwa na kuongeza kuwa "si kwa sababu ya afya... sijui kwa kweli... ni vigumu kutoa maoni kuhusu hilo".
Kardinali Njue alikuwa Askofu Mkuu wa Nairobi kutoka 2007 hadi kustaafu kwake 2021.
Aliteuliwa kuwa kadinali mwaka 2007 na Papa Benedict XVI na kuwa kadinali wa pili kutoka nchini humo.
Yeye na Kadinali wa Uhispania Antonio Cañizares, 79, ndio makadinali pekee ambao hawatashiriki katika kura ya papa kati ya 135 ambao wanastahili.
Theluthi mbili ya walio wengi, au angalau 89 kati yao, wanatakiwa kumchagua papa mpya na mrithi wa Papa Francis kuwaongoza Wakatoliki bilioni 1.4 duniani.
Israel yashambulia uwanja mkuu wa ndege mjini Sanaa Yemen
Chanzo cha picha, Reuters
Maelezo ya picha, Shambulio la anga la Israel kwenye mji mkuu wa Yemeni Sanaa tarehe 6 Mei, 2025
Jeshi la Israel (IDF) limethibitisha kuwa shambulizi la angani la Israel limepiga Uwanja wa Ndege wa Kimataifa wa Sanaa katika mji mkuu wa Yemen.
Mapema siku hiyo, IDF iliomba watu kuhama uwanja wa ndege, ikionya kwamba "kushindwa kuhama na kukaa mbali na eneo hilo kunakuweka hatarini."
Haya yanajiri siku moja baada ya Israel kushambulia shabaha katika mji jirani wa Hudaydah.
Mashambulizi hayo yalifuatia kombora la kundi la Houthi la Yemen lililotua karibu na uwanja mkuu wa ndege wa Israel siku ya Jumapili.
Israel imeanzisha mashambulizi kadhaa dhidi ya kundi linaloungwa mkono na Iran nchini Yemen, ikiwa ni pamoja na kulenga kituo cha kuzalisha umeme na bandari mwezi Januari.
Hapo awali Israel ilifanya mashambulizi kwenye uwanja wa ndege wa Sanaa Desemba mwaka jana.
Ousmane Dembele apona jeraha la mguu tayari kwa mechi ya mkondo wa pili dhidi ya Arsenal
Chanzo cha picha, EPA
Mshambuliaji wa Paris St-Germain, Ousmane Dembele yuko fiti kwa ajili ya mechi ya Jumatano ya nusu fainali ya Ligi ya Mabingwa dhidi ya Arsenal baada ya kupona jeraha la misuli ya paja.
Mshambulizi huyo wa Ufaransa alitiliwa shaka baada ya kutoka katikati ya kipindi cha pili cha mkondo wa kwanza wa juma lililopita kwenye Uwanja wa Emirates.
Mchezaji huyo mwenye umri wa miaka 27, ambaye alifunga bao pekee kaskazini mwa London, alikosa kipigo cha wikendi cha Paris St-Germain Ligue 1 dhidi ya Strasbourg lakini alianza mazoezi tena Jumatatu.
"Amekuwa akifanya mazoezi nasi kwa siku mbili zilizopita," meneja Luis Enrique alisema.
Dembele, ambaye alihamia mji mkuu wa Ufaransa kutoka Barcelona mnamo 2023, ndiye mfungaji bora wa Paris St-Germain msimu huu akiwa na mabao 33 katika mashindano yote.
Mashambulizi ya wanamgambo wa Sudan yaacha mji muhimu bila umeme
Chanzo cha picha, Reuters
Mashambulizi ya ndege zisizo na rubani yamepiga kituo kikubwa cha umeme katika mji wa Port Sudan nchini Sudan na kusababisha "kukatika kabisa kwa umeme", mtoa huduma wa umeme wa nchi hiyo amesema.
Milipuko na moto mkubwa umeripotiwa karibu na uwanja mkuu wa ndege wa kimataifa wa mji huo huku jeshi la wanamgambo likilenga mji huo muhimu kwa siku ya tatu mfululizo.
Safari za ndege zimekatishwa baada ya ndege zisizo na rubani kugonga uwanja wa ndege wa kimataifa na hoteli karibu na ikulu ya rais, ripoti zinasema.
Moshi mnene mweusi ungeweza kuonekana alfajiri kwenye anga ya jiji ambalo hapo awali lilikuwa salama ambapo maelfu ya watu wanaokimbia vita vya wenyewe kwa wenyewe vilivyodumu kwa miaka miwili wametafuta hifadhi.
Siku ya Jumanne, kampuni ya umeme ya Sudan ilisema inatathmini uharibifu kwenye kituo chake, ambacho kimetatiza usambazaji wa maji, afya na huduma nyinginezo.
Ndege moja isiyo na rubani ililenga sehemu ya raia ya uwanja wa ndege wa Port Sudan na nyingine ikagonga kambi kuu ya jeshi katikati mwa mji huo, walioshuhudia wameliambia shirika la habari la AFP.
Trump awapa wahamiaji haramu $1,000 'kujiondoa nchini humo'
Chanzo cha picha, Getty Images
Maelezo ya picha, Mpango huo unategemea matumizi ya programu ya CBP One, ambayo safari ya mhamiaji nyumbani inaweza kufuatiliwa.
Serikali ya Marekani inawapa wahamiaji ambao wako nchini kinyume cha sheria kiasi cha dola 1,000 (£751) na kulipa usafiri ikiwa wataamua kuondoka Marekani.
"Kujiondoa mwenyewe ni njia bora zaidi, salama na ya gharama nafuu ya kuondoka Marekani ili kuepuka kukamatwa," Waziri wa Usalama wa Ndani Kristi Noem alisema katika tangazo la Jumatatu.
Wale ambao watapokea ofa hiyo wanaweza siku moja kupewa njia ya kisheria ya kurejea Marekani, Trump aliwaambia waandishi wa habari siku hiyo hiyo.
Tangu arejee madarakani mwezi Januari, rais ameanzisha msako mkali dhidi ya wahamiaji haramu - wakati fulani akitegemea mbinu zenye utata kama vile kupitishwa kwa sheria ya karne nyingi za wakati wa vita.
Baadhi ya hatua zimekabiliwa na changamoto za kisheria. Wale waliojiandikisha kwa motisha ya kifedha ya "kujiondoa" hawatapewa kipaumbele kwa kuzuiliwa na maafisa wa uhamiaji, Idara ya Usalama wa Nchi (DHS) ilisema katika taarifa ya habari.
DHS ilisema "mgeni haramu" wa kwanza alikuwa tayari amepokea ofa hiyo, akipokea tikiti ya ndege kutoka Chicago hadi Honduras.
Mpango huo unategemea wahamiaji wanaotumia programu ya CBP Home, ambayo inaweza kutumika kuthibitisha mtu huyo kurudi katika nchi yake.
Walielezea ofa hiyo kama njia ya "heshima", na kuongeza kuwa itapunguza gharama ya kufukuzwa kwa DHS.
Gharama ya wastani ya kukamata, kuzuilia, na kumfukuza mhamiaji kwa sasa ilifikia zaidi ya $17,000, walisema.
Trump mwenyewe alisema swali la iwapo mhamiaji yeyote atakayepewa siku moja atapewa njia halali ya kurejea Marekani ni la maslahi ya kitaifa.
Urusi kuonyesha nguvu zake za kijeshi katika gwaride la siku ya ushindi Ijumaa
Chanzo cha picha, Getty Images
Siku ya Ijumaa, Urusi inatazamiwa kusherehekea gwaride la kijeshi la Siku ya Ushindi la kila mwaka huko bustani ya Red Square.
Mwaka huu, ni sawa na usitishaji mapigano nchini Ukraine, uliotangazwa kwa upande mmoja na Urusi mwezi uliopita.
Sherehe hiyo inaashiria ushindi dhidi ya Ujerumani ya Nazi mwaka 1945, na kumalizika kwa vita vya dunia vya pili huko Ulaya.
Umoja wa Kisovieti ulipoteza takriban raia milioni 27 wakati wa vita - zaidi ya nchi nyingine yoyote katika vita.
Kutokana na hali hiyo, Rais Vladimir Putin ametumia umuhimu wa kitaifa wa siku hiyo kukuza wazo la ushindi wa kishujaa dhidi ya ufashisti - kwa kuonyesha nguvu za kijeshi na vifaa vya Urusi.
Mwaka jana, mhariri wetu wa Urusi Steve Rosenberg aliripoti kwamba gwaride la kijeshi la kila mwaka la Red Square lilihisi tofauti, wakati wa vita nchini Ukraine.
"Tunaadhimisha Siku ya Ushindi wakati ambapo tunatekeleza Operesheni Maalum ya Kijeshi," Rais Vladimir Putin alisema katika hotuba yake.
"Wale wanaoshiriki kwenye mstari wa mbele ni mashujaa wetu."
Urusi yafanya mashambulizi miji ya Sumy na Odesa huku Ukraine ikirusha ndege zisizo na rubani mjini Moscow
Chanzo cha picha, Getty Images
Maelezo ya picha, Wazima moto huko Kharkiv kufuatia shambulio la ndege ya Urusi
Mara moja, mashambulizi ya angani yaliendelea kati ya Urusi na Ukraine - haya ndio unahitaji kujua: Urusi inasema Ukraine iliendesha shambulio la usiku wa kuamkia jana dhidi ya Moscow kwa ndege zisizo na rubani kwa usiku wa pili mfululizo, huku vyombo vya habari vikiripoti kuwa vitengo vya ulinzi wa anga vilidungua ndege 105 za Ukraine.
Viwanja vyote vinne vya ndege vya Moscow vilifungwa kwa saa kadhaa baada ya mashambulizi ya jana usiku, lakini vimefunguliwa tena
Wakati huo huo, shambulio la ndege zisizo na rubani za Urusi katika mji wa Odesa na eneo la Sumy nchini Ukraine zimesababisha vifo vya watu wanne, maafisa wa Ukraine wanasema - wanne walijeruhiwa katika shambulio katika mji wa mashariki wa Kharkiv.
Huku mashambulizi ya angani yakiendelea, mapigano yanaendelea huko Kursk, eneo la Urusi ambalo Ukraine ilifanya mashambulizi ya kushtukiza mwaka jana.
Wiki iliyopita, jeshi la Urusi lilidai kuwa limepata tena udhibiti kamili wa Kursk - lakini Ukraine inakanusha hilo, ikishikilia kuwa bado ina jeshi katika eneo hilo.
Haya yote yanajiri kabla ya usitishaji vita wa siku tatu - uliotangazwa kwa upande mmoja na Urusi mwezi uliopita.
Mahakama Tanzania yaamuru tarehe 19 Mei Lissu apelekwe mahakamani kwa ajili ya kesi yake
Chanzo cha picha, Getty Images
Mahakama nchini Tanzania imeamuru tarehe 19 Mei, Mwenyekiti wa Chadema, Tundu Lissu apelekwe mahakamani kwa ajili ya kesi yake.
Mawakili wa Lissu wanasema wamefurahishwa na uamuzi huo kwasababu kutopelekwa kwa Lissu mahakamani na kuzuiliwa kwa umma kuhudhuria kungeanzisha kasumba mbaya.
Kwa kupelekwa kwa Lissu mahakamani, Umma pia utaruhusiwa kwenda kusikiliza kama ambavyo sheria inavyoruhusu
Hata hivyo mawakili wamewaomba wale watakaokwenda mahakamani wazingatie staha na wajibu wa kufanya hivyo kwa amani.
Kuhusu namna anavyotendewa gerezani, kunyimwa kuwaona mawakili wake Mara kwa mara, na kufanya nao mazungumzo kwa faragha, Mahakama imesema haina mamlaka ya kuamuru gereza lijiendeshaje.
Mwenyekiti wa AU na Kiir wajadili hali ya Sudan Kusini
Rais wa Sudan Kusini Salva Kiir amefanya mazungumzo kuhusu hali ya nchi hiyo na ujumbe wa Umoja wa Afrika na Mamlaka ya Maendeleo ya Kikanda (Igad), ofisi ya rais wa Sudan Kusini ilirifu kupitia mtandao wa Facebook.
"Ujumbe huo ambao uliongozwa na Mwenyekiti wa Kamisheni ya Umoja wa Afrika Mahmoud Ali Youssouf, ulilenga kuharakisha mchakato wa utekelezaji wa makubaliano ya amani, kuimarisha amani na usalama wa kikanda, na kuendesha utawala wa kidemokrasia nchini," ilisema ofisi ya rais.
Naibu katibu mtendaji wa Igad, Mohamed Abdi Ware, alikuwa sehemu ya wajumbe waliokuwa na lengo la "kupata taarifa za moja kwa moja kuhusu hali ya sasa ya mambo nchini".
Haijabainika iwapo maafisa hao watakutana na Makamu wa Kwanza wa Rais wa Sudan Kusini Riek Machar ambaye amewekwa katika kizuizi cha nyumbani, lakini ripoti zinasema watafanya leo tarehe 6 Mei kabla ya kuondoka nchini humo.
Afisa wa Chama cha Machar cha Sudan People's Liberation Movement in Opposition (SPLM-IO) alisema "hatujapokea taarifa yoyote kwamba wajumbe hao watakutana na Machar ... na sio haki kwa sababu watapokea maelezo ya upande mmoja", Redio Tamazuj iliripoti.
Serikali hapo awali iliwanyima wajumbe wa kimataifa kumfikia Machar.
Jayo yanajiri huku kukiwa na mvutano mkubwa wa kisiasa na kiusalama kufuatia hatua ya Machar kuwekwa kizuizini tarehe 26 Machi, katika hali ambayo inaripotiwa kutishia mpango wa 2018 uliomaliza vita vya wenyewe kwa wenyewe vilivyodumu kwa miaka mitano.
Hamas yasema 'hakuna maana' ya mazungumzo wakati Israel ikipanga kupanua operesheni Gaza
Chanzo cha picha, Reuters
Afisa mkuu wa Hamas amesema "hakuna maana" ya mazungumzo zaidi kuhusu mpango mpya wa kusitisha mapigano na kuwaachilia mateka Gaza baada ya Israel kusema kuwa itapanua mashambulizi yake ya ardhini na kuikalia Gaza kwa muda usiojulikana.
Bassem Naim aliiambia BBC kuwa kundi linalojihami la Palestina halitajihusisha na mapendekezo mapya huku Israel ikiendelea na kile alichokiita "vita vya njaa".
Israel inasema lengo lake ni kuwarejesha mateka ambao bado wanashikiliwa na Hamas.
Maafisa wa Israel walisema siku ya Jumatatu kuwa mipango hiyo inahusisha kuwahamisha watu wengi zaidi ya milioni 2.1 wa Gaza, kuteka eneo lote, na kudhibiti misaada ya kibinadamu baada ya kizuizi cha miezi miwili.
Pia walisema mashambulizi hayo hayataanza hadi baada ya ziara ya Rais wa Marekani Donald Trump katika eneo hilo wiki ijayo, na kuwapa Hamas kile walichokiita "dirisha la fursa" kufikia makubaliano.
Uingereza, Ufaransa na Umoja wa Mataifa wamekosoa mipango mipya ya Israel.
Katibu Mkuu wa Umoja wa Mataifa António Guterres alielezea wasiwasi wake na kuonya kwamba "itasababisha raia wengi zaidi kuuawa na uharibifu zaidi Gaza".
Mashirika ya Umoja wa Mataifa na washirika wao pia wamelaani pendekezo la Israel la kuwasilisha misaada kupitia makampuni ya binafsi katika vituo vya kijeshi, wakisema kuwa itakuwa ni ukiukaji wa kanuni za msingi za kibinadamu na kwamba hawatatoa ushirikiano.
Makao makuu ya jeshi la Sudan yakumbwa na msururu wa mashambulizi
Chanzo cha picha, Getty Images
Mji wa Port Sudan - makao makuu ya serikali inayoongozwa na jeshi la Sudan na kitovu cha misaada ya kibinadamu kwa nchi hiyo - umekumbwa na mashambulizi ya ndege zisizo na rubani kwa siku ya tatu mfululizo.
Wanajeshi wa Sudan wanawalaumu waasi wa RSF, kwa kuhusika na mashambulizi hayo japo kundi hilo halijakiri kuhusika.
Maelfu ya watu wameuawa katika miaka miwili ya vita vikali kati ya jeshi na RSF na zaidi ya milioni 12 wamekimbia makazi yao.
Mashahuda wanaripoti kuona moshi mkubwa mweusi ukifuka kutoka maeneo tofauti jijini humo ikiwa ni pamoja na eneo linalozunguka bandari kuu na uwanja wa ndege.
Mashambulizi hayo yametatiza usafari katika eneo hilo.
Ndege hizo zisizo na rubani zinaripotiwa kulenga kituo cha umeme na hoteli.
Hadi siku tatu zilizopita, mji wa Port Sudan ulikuwa kimbilio la maelfu ya Wasudan walitoroka makaazi yao.
Ghasia za hivi karibuni, zimevuruga hali ya utulivu waliopata katika mji huo kwani vita vimekuwa vikiaendelea kwa zaidi ya miaka miwili.
Mashambulizi hayo ya ndege zisizo na rubani hapo awali yalilenga ghala la mafuta na kambi ya kijeshi.
Rihanna afichua kuwa ana ujauzito wa mtoto wa tatu
Chanzo cha picha, Getty Images
Mwimbaji Rihanna amethibitisha kuwa anatarajia mtoto wake wa tatu wakati akihudhuria usiku mkubwa wa mwaka wa mitindo, Met Gala huko New York.
Mwanamke huyo mwenye umri wa miaka 37 alikumbatia tumbo lake na kutabasamu mbele ya kamera akiwa kwenye zulia jekundu.
Rihanna, ambaye jina lake halisi ni Robyn Fenty, na mpenzi wake, rapa A$AP Rocky, tayari wana watoto wawili wa kiume.
A$AP Rocky, anayejulikana pia kama Rakim Mayers, aliwashukuru wanahabari ambao walitoa pongezi zao kwenye zulia jekundu.
"Ni wakati wa kuwaonesha tu watu kile tulichokuwa tunakipika," alisema.
A$AP Rocky, mwenyekiti mwenza wa hafla hiyo, alithibitisha habari za ujauzito wa wanandoa hao kwenye zulia jekundu.
"Asante, asante, asante," rapper huyo alisema.
"Nina furaha kila mtu ana furaha kwa ajili yetu kwa sababu hakika tuna furaha", aliongeza.
Israel yashambulia maeneo ya Wahouthi nchini Yemen
Chanzo cha picha, Getty Images
Jeshi la Israel linasema kuwa limeshambulia maeneo ya Wahouthi nchini Yemen kujibu kurusha kombora la kundi hilo katika uwanja wa ndege wa Ben Gurion siku iliyotangulia.
IDF ilisema ilishambulia maeneo ambayo ilidai kuwa "chanzo kikuu cha usambazaji wa Houthi" katika Bandari ya Hudaydah, pamoja na kiwanda cha saruji cha Bajil mashariki mwa jiji la Hudaydah.
Kufuatia shambulizi kwenye uwanja wa ndege Jumapili, Houthi walisema wataweka "vizuizi kamili vya anga" kwa Israel kwa kulenga viwanja vya ndege kujibu mipango ya Israel ya kupanua shughuli zao huko Gaza.
Kundi linaloungwa mkono na Iran limesema watu 21 walijeruhiwa katika shambulio hilo la Jumatatu, na kueleza kuwa ni uvamizi wa pamoja wa "uchokozi wa Marekani na Israel".
Marekani ilikana kuhusika.
IDF ilisema shambulizi lake la Jumatatu "lilifanywa kwa usahihi, na hatua zilizochukuliwa kupunguza madhara kwa meli zilizotia nanga kwenye bandari".
Ilidai kuwa kiwanda cha Bajil kilifanya kazi kama "rasilimali kubwa ya kiuchumi", na kilitumiwa na kikundi hicho kujenga vichuguu na miundombinu, wakati maeneo ya bandari yalitumiwa "kwa uhamishaji wa silaha za Iran".
Bandari hiyo ni ya pili kwa ukubwa katika Bahari ya Shamu baada ya Aden, na ndiyo sehemu ya kuingilia kwa takribani 80% ya bidhaa za chakula zinazoagizwa Yemen.
Wakazi wengi waliliambia shirika la habari la Reuters kwamba zaidi ya mashambulizi 10 yalilenga Bandari ya Hudaydah na maeneo ya al-Salakhanah na al-Hawak jijini, huku mine mingine ikilenga kiwanda cha saruji.
Msemaji wa wizara ya afya inayoongozwa na Houthi, Anees al-Asbahi, alisema takribani watu 21 walijeruhiwa katika shambulio hilo.
Waasi wa Houthi walilaumu Marekani na Israel kwa pamoja kwa shambulio hilo.
Gari la Papa Francis lageuzwa zahanati ya kuwatibu watoto wa Gaza
Chanzo cha picha, Caritas Jerusalem
Maelezo ya picha, Gari la Papa Francis kubadilishwa kuwa zahanati
Moja ya magari yaliyotumiwa na Papa Francis
kusalimia maelfu ya watu litageuzwa kuwa zahanati inayotembea ili kusaidia watoto wa
Gaza.
Shirika la hisani
la Caritas linalosimamia mradi huo, lilisema gari hilo lililotumika wakati wa
ziara ya marehemu Papa mjini Bethlehem mwaka 2014, kwa sasa lina vifaa vya
kutosha i kutoa huduma za afya katika maeneo ya vita, kwa ombi la Papa Francis.
Shirika hilo
lilisema katika taarifa yake: "zahanati hiyo itakuwa na vifaa vya kufanya vipimo vya haraka,
sindano, mitungi ya oksijeni, chanjo, na friji ndogo ya kuhifadhi dawa."
Vatican ilisema kuwa hilo lilikuwa ombi la mwisho la Papa kwa watoto wa Gaza
kabla ya kifo chake mwezi uliopita.
Gari hilo kwa
sasa liko Bethlehem na litaingia katika Ukanda wa Gaza wakatinjia ya kibinadamu
itafunguliwa na Israel.
Urusi yasema viwanja vya ndege vyote mjini Moscow vimefungwa baada ya shambulio la ndege zisizo na rubani
Chanzo cha picha, EPA
Urusi inasema Ukraine imeanzisha shambulizi la usiku wa
kuamkia jana na ndege isiyo na rubani iliyolenga Moscow kwa usiku wa pili
mfululizo.
Viwanja vyote vinne vya ndege vikubwa vya mji mkuu
vimefungwa kwa muda ili kuhakikisha usalama, shirika la uangalizi wa anga la
Urusi Rosaviatsia lilisema kwenye Telegram.
Meya wa Moscow, Sergei Sobyanin, alisema kwenye mitandao ya
kijamii takribani ndege 19 zisizo na rubani za Ukraine ziliharibiwa kabla ya
kufika mjini "kutoka pande tofauti". Alisema baadhi ya vifusi hivyo
vimetua kwenye moja ya barabara kuu za kuingia mjini, lakini hakuna
majeruhi.
Ukraine bado haijasema chochote. Lakini meya wa Kharkiv alisema
Urusi pia imefanya mashambulizi ya ndege zisizo na rubani katika mji huo usiku
kucha, na pia katika eneo la Kyiv.
Pamoja na huko Moscow, magavana wa miji mingine ya Urusi,
pamoja na Penza na Voronezh, pia walisema walikuwa wakilengwa na ndege zisizo
na rubani usiku wa Jumanne.
Ni usiku wa pili mfululizo ambapo Urusi imeripoti shambulio
la ndege zisizo na siku ya Jumatatu, wizara ya ulinzi ya
Urusi ilisema kuwa imeharibu ndege 26 za Ukraine usiku kucha.
Tangu uvamizi wa Urusi nchini Ukraine zaidi ya miaka
mitatu iliyopita, Kyiv imeanzisha mashambulizi kadhaa ya ndege zisizo na rubani
mjini Moscow. Shambulio lake kubwa zaidi mwezi Machi liliua watu watatu.
Habari za asubuhi na karibu katika taarifa zetu siku ya leo
